Verslun Costco í Kauptúni mun opna þann 23.maí næstkomandi og er óhætt að segja að íslenskir neytendur bíði í ofvæni. Greint var frá því í gær að stefnt er að því að opna bensínstöð Costco nokkrum dögum áður en verslunin sjálf mun opna. Alls verða sextán bensíndælur til taks hjá Costco í Kauptúni en fram hefur komið að verslunin mun kaupa eldsneytið frá Skeljungi, að minnsta kosti fyrst um sinn.

Góður díll Myndin sem gengur um samfélagsmiðla sýnir mun lægra verð en hjá samkeppnisaðilum

Til marks um spenninginn þá gengur mynd um samfélagsmiðla sem er sögð vera af bensíndælu frá Costco og sýna útsöluverð verslunarinnar á bensíni og dísel. Er verðið sagt vera 169,9 krónur á líterinn fyrir bensínið en 164,9 krónur fyrir díselolíuna. Það er um 20 krónum ódýrara en lægsta verð hjá íslenskum samkeppnisaðilum.

En ekkert allt sem sýnist. DV óskaði eftir staðfestingu frá Costco og þá kom í ljós að verið var að prófa bensíndælurnar og því væri ekkert að marka uppgefið verð. Íslenskir neytendur þurfa því að bíða í nokkra daga í viðbót.

Talið er að Costco muni að öllum líkindum bjóða mun lægra verð á eldsneyti hér á landi. Það gerir verslunin annarsstaðar til að laða viðskiptavini að versluninni og eru áætlanir um bensínkaup í takt við það. Fyrirtækið hyggst kaupa rúmlega 10 milljón lítra af bensíni á þessu ári, sem samsvarar 3% af öllu bensíni á Íslandi á ári.