Óánægja er innan rannsóknardeildar lögreglu með frétt Ríkisútvarpsins í gærkvöldi þar sem fullyrt var í fyrirsögn að Birna Brjánsdóttir hefði drukknað. Í frétt RÚV í gærkvöldi var greint frá því að líkið hefði verið nakið þegar það fannst í fjörunni við Selvogsvita og áverkar bentu til að þrengt hefði verið að hálsi Birnu.

Grímur Grímsson hafði fyrr um morguninn, sama dag og fréttastofa Ríkisútvarpsins greindi frá að Birna hefði drukknað, neitað að upplýsa um banamein Birnu í samtali við RÚV. Sagði Grímur að það gæti skaðað rannsóknina að greina frá dánarorsökinni. Síðar um kvöldið fór sú frétt í loftið að Birna hefði drukknað. Við það er lögreglan ósátt.

Tekist hefur verið á um það hvort rétt hafi verið að greina frá þessum upplýsingum. Vigdís Hauksdóttir gagnrýndi harkalega á Facebook að þessar upplýsingar hefðu farið í loftið. Kristinn Hrafnsson og Helgi Seljan gripu til varnar fyrir Ríkisútvarpið og sagði Kristinn Hrafnsson meðal annars:

„enn hef ég ekki séð neinn sem kemur að rannsókninni halda því fram að skaði hafi hlotist.“

DV hefur öruggar heimildir fyrir því að óánægja sé innan lögreglunnar með að ríkisútvarpið hafi birt þessar upplýsingar. Málið sé á viðkvæmu stigi og stórt í sniðum og hefur vakið athygli langt út fyrir landsteinana. Grímur Grímsson yfirlögregluþjónn sem fer með rannsóknina á láti Birnu staðfestir í samtali við DV að óánægju gæti meðal þeirra sem rannsaka málið að þessar upplýsingar hafi verið birtar. Grímur segir:

Mynd: DV ehf / Sigtryggur Ari

„Það er óheppilegt að greint sé frá þessum smáatriðum í málinu. Það verður að viðurkennast.“

Þú sagðir fyrr um daginn að það gæti skaðað rannsóknina að greina frá dánarorsökinni. Þessar upplýsingar sem koma fram í fréttinni, geta þær skemmt fyrir rannsókn málsins?

„Ég vil ekki segja of mikið og reyna svara þessu frekar almennt og við skiljum að fjölmiðlar óski eftir upplýsingum um rannsóknina en við erum íhaldssöm þegar kemur að því að veita upplýsingar um málið. Hvort þetta eigi eftir að hafa áhrif á rannsóknina á eftir að koma í ljós. Málið er viðamikið og viðkvæmt. Það er eins og ég sagði óheppilegt að greint sé frá þessum smáatriðum í málinu. Það er okkar svar.“