Stjörnufræðingar hafa fundið risastórt svarthol sem er svo stórt að það ætti eiginlega ekki að geta verið til. Svartholtið var jafn þungt og 800 milljónir sólir (er þá miðað við sólina okkar) aðeins 690 milljón árum eftir Miklahvell. Nú klóra vísindamenn sér í höfðinu og velta fyrir sér hvernig svartholið gat verið orðið svo stórt svo snemma í sögu alheimsins.
Það var í raun ekki svartholið sjálft sem stjörnufræðingarnir sáu heldur ljósið frá því efni sem var við að hverfa ofan í svartholið. Svarthol, sem sendir óbeint frá sér birtu á þennan hátt, kallast kvasi eftir því sem segir á vef Videnskab.dk. Kvasar senda mikla birtu frá sér og því er hægt að sjá þá úr órafjarlægð.
Alþjóðlegur hópur vísindamanna fann svartholið þegar þeir greindu gögn úr þremur mismunandi rannsóknum. Með því að rannsaka ljósið frá kvasanum, rauða ljósið, gátu stjörnufræðingarnir reiknað út að ljósið hafði verið 13,1 milljarða ára á leiðinni til jarðarinnar. Ljósið lagði því af stað þegar alheimurinn var aðeins 690 milljón ára en hann er í dag 13,8 milljarða ára gamall.
Stjörnufræðingar hafa aldrei áður séð svo fjarlægt svarthol en skýrt er frá rannsókn þeirra í vísindaritinu Nature. Útreikningar stjörnufræðinganna sýna einnig að massi svartholsins hafi verið á við um 800 milljónir sóla (miðað við sólina okkar) en þó er töluverð óvissa um þessa útreikninga.
Á vef Videnskab.dk er haft eftir Marianne Vestergaard, lektor við Niels Bohr stofnunina við Kaupmannahafnarháskóla, að svartholið geti vel verið stærra eða minna en þetta en það sé nokkurn veginn í þessum stærðarflokki. Hún vinnur sjálf að rannsóknum á ofurmassa svartholum en kom ekki að þessari rannsókn.
Hún sagði að þetta svarthol væri mjög þungt miðað við aldur og það sé erfitt að finna skýringu á því hvers vegna svo sé. Það komi mjög á óvart að finna svo þungt svarthol á fyrstu árum alheimsins.
Robert Simcoe, prófessor við MIT og einn höfunda rannsóknarinnar, segir að þetta sé eina svartholið frá þessum tíma alheimsins sem hafi fundist. Alheimurinn hafi verið svo ungur að svartholið ætti í raun ekki að vera til.
„Alheimurinn var einfaldlega ekki nægilega gamall til að geta myndað svo stórt svarthol. Þetta er mjög skrýtið.“
