Donald Trump Bandaríkjaforseti hefur verið gagnrýndur fyrir ýmislegt í gegnum tíðina en eitt verður þó ekki tekið af honum. Trump, sem er 72 ára, hefur alla tíð verið bindindismaður og aldrei svo mikið sem reykt sígarettu.
Donald Trump átti bróður, Fred Trump, sem lengi barðist við Bakkus. Hann lést árið 1981, 43 ára að aldri, eftir langa baráttu við alkóhólisma. Fred, sem var flugmaður, lagði hart að bróður sínum að falla ekki í sömu gryfju og hann og hvatti hann til að láta áfengið eiga sig. Trump var 35 ára þegar bróðir hans lést.
Trump sagði frá þessu á blaðamannafundi í Washington í viknni þegar hann ræddi þá grafalvarlegu stöðu sem komin er upp í fíkniefnamálum í Bandaríkjunum. Sífellt fleiri láta lífið af völdum harðra fíkniefna og er raunar talað um faraldur í þeim efnum.
„Ég átti bróður, Fred, – frábær gaur, myndarlegur og frábær persónuleiki, miklu betri persónuleiki en ég,“ sagði Donald Trump. „En hann átti við vandamál að stríða. Hann átti í vanda með áfengið og hann sagði ítrekað við mig „ekki drekka, ekki drekka“. Hann var töluvert eldri en ég og ég hlustaði á hann enda bar ég virðingu fyrir honum.“
Donald sagði að bróðir hans hafi einnig lagt hart að honum að snerta ekki tóbak. „Ég hef aldrei drukkið áfengi og ekki einu sinni langað til þess, ég hef engan áhuga á því. Hann hjálpaði mér. Ég hafði einhvern sem gat leiðbeint mér. Líf hans var mjög, mjög erfitt vegna áfengisins.“
