Lögbann hefur verið lagt á störf Loga Bergmann Eiðssonar hjá Árvaki og Símanum. 365 gerir kröfu um að lögbann verði sett á vinnu hans þar sem fyrirtækið telur að Logi sé að brjóta gegn ráðningarsamningi sínum við fyrirtækið.

Vísir greinir frá þessu. Í síðustu viku var greint frá því að Logi Bergmann hefði náð samningi við útvarpsstöðina K100, sem er í eigu Árvakurs, útgefanda Morgunblaðsins og mbl.is, um að taka að sér dagskrárgerð á stöðinni. Auk þess átti hann að starfa á ritstjórn Morgunblaðsins

Vísir vitnar í tilkynningu 365 þar sem segir: „Mánudaginn 9. október síðastliðinn sagði Logi Bergmann Eiðsson upp störfum hjá 365. Sama dag barst 365 sú vitneskja að Logi Bergmann hefði ráðið sig fyrir uppsögnina til starfa hjá Árvakri hf. og Sjónvarpi Símans hf. Um það var tilkynnt með frétt í Morgunblaðinu 11. október síðastliðinn. Með þessu braut Logi freklega gegn skyldum sínum á grundvelli ráðningarsamnings við 365, sem kveður á um 12 mánaða uppsagnarfrest og 12 mánaða samkeppnisbann að honum loknum.

„365 var því nauðugur sá kostur að krefjast þess hjá sýslumanninum á höfuðborgarsvæðinu að lögbann yrði lagt á störf Loga Bergmanns hjá þessum aðilum. Af tillitsemi við Loga var krafa 365 sú að lögbanninu yrði afmarkaður tími til næstu 12 mánaða í stað 24 mánaða, eins og 365 hefði getað gert kröfu um á grundvelli starfssamnings Loga Bergmanns.“