Einkahlutafélagið Okkar Bakarí ehf var tekið til gjaldþrotaskipta þann 26. september síðastliðinn. Félagið rekur samnefnt bakarí í Garðabæ. Eigandi og framkvæmdastjóri bakarísins er Jón Heiðar Ríkharðsson. Greint var frá því á vef Eiríks Jónssonar árið 2012 að Jón Heiðar hefði fest kaup á bakarínu og var sérsaklega tekið fram að hann væri eiginmaður Rannveigar Rist forstjóri Rio Tinto Alcan á Íslandi.
„Jón Heiðar starfaði áður sem forstöðumaður Svæðisskrifstofu fatlaðra í Reykjavík en vendir nú kvæði sínu í kross og fer í bakkelsið. Ekki það að hann sé bakari heldur er hér um hreinan viðskiptagjörning að ræða, Jón Heiðar kaupir bakaríið og rekur sem hvert annað fyrirtæki með starfslið bakara og aðstoðarfólks,“ kom einnig fram í umræddri frétt.
Skiptafundur verður haldinn þann 19.desember næstkomandi. Fram kemur í úrskurði héraðsdóms Reykjaness þann 26. september síðastliðinn að búið hafi verið tekið til gjaldþrotaskipta en skiptastjóri búsins er Jón Auðunn Jónsson.
Skorað hefur verið á alla þá, sem telja til skulda eða annarra réttinda á hendur búinu eða eigna í umráðum þess, að lýsa kröfum sínum fyrir skiptastjóra í búinu innan tveggja mánaða.
