Áhersla lögð á að tryggja langtímarekstraröryggi í greininni
Útgerðarmenn eru ekki áhyggjufullir vegna stefnuyfirlýsingar nýrrar ríkisstjórnar í sjávarútvegsmálum. Þetta kemur fram í Morgunblaðinu í dag, en blaðið er að stærstum hluta í eigu útgerðarinnar. Viðreisn lagði í kosningabaráttunni mikla áherslu á að ráðast þyrfti í kerfisbreytingar, meðal annars í sjávarútvegi.
Í ríkisstjórnarsáttmálanum, sem kynntur var í gær, kemur fram að gæta þurfi að langtímarekstraröryggi í greininni. Hvergi er minnst á að kvóti verði boðinn upp heldur kemur fram að núgildandi fiskveiðistjórnunarkerfi hafi skilað miklum þjóðhagslegum ávinningi. Mikil hagræðing hafi átt sér stað og tekist hafi að tryggja sjálfbærni fiskveiða á Íslandsmiðum. Þá segir:
„Ríkisstjórnin telur kosti aflamarkskerfisins mikilvæga fyrir áframhaldandi verðmætasköpun í sjávarútvegi. Kannaðir verða kostir þess að í stað ótímabundinnar úthlutunar verði byggt á langtímasamningum og samhliða verði unnið að mati á þeim kostum sem tækir eru, svo sem markaðstengingu, sérstöku afkomutengdu gjaldi eða öðrum leiðum, til að tryggja betur að gjald fyrir aðgang að sameiginlegri auðlind verði í eðlilegu hlutfalli við afrakstur veiðanna. Gæta þarf að langtímarekstraröryggi í greininni og stöðugleika í byggðum.
Haft er eftir formanni Samtaka fyrirtækja í sjávarútvegi, Jens Garðari Helgasyni, að þó opnað væri á ýmsa möguleika í sáttamála flokkanna, hafi hann ekki áhyggjur. Fylgst yrði með störfum nýs sjávarútvegsráðherra á næstunni en í dag tekur Þorgerður Katrín Gunnarsdóttir við ráðuneyti sjávarútvegs og landbúnaðar.