Það óhapp varð á flughlaði Keflavíkurflugvallar fyrr í vikunni að ökumaður á vinnuvél frá veitingaþjónustufyrirtæki ók á flugvél í stæði. Ökumaðurinn gat ekki framvísað vinnuvélaskírteini því hann hafði aldrei öðlast réttindi til að stjórna vinnuvél.

Þetta kemur fram í tilkynningu frá Lögreglunni á Suðurnesjum. Ástæðan fyrir óhappinu var sú að ökumaður vinnuvélarinnar steig á eldsneytisgjöfina þegar hann ætlaði að stíga á bremsuna. Dæld kom á skrokk vélarinnar við höggið.

Verið var að búa flugvélina til brottfarar þegar vinnuvélinni var ekið á hana og dróst brottförin
um sólarhring meðan verið var að ganga úr skugga um að hún væri hæf til flugs.

Lögreglan á Suðurnesjum fer með rannsókn málsins.