Barstólar sem Hótel Rangá deildi á Facebook-síðu sinni í dag hafa farið fyrir brjóstið á mörgum og hrannast þar inn fordæmingar á stólunum, sem líkjast neðri hluta kvenmanns. María Lilja Þrastardóttir blaðamaður reið á vaðið og segir að stólarnir hlutgera konur og að hótelið væri „heimskulegt karlrembusvín“.

Ekki eru allir sammála Maríu Lilju og skrifar til að mynda Christina nokkur Picchi: „Æ særði stólinn tilfinningar þínar?“. María Lilja svarar játandi og spyr á móti hvort hvort hún væri sama sinnis. „Nei, ég er ekki svo viðkvæm að barstól með fætur móðgi mig,“ svarar Picchi.

Því svarar María Lilja að hún ætti að móðgast þar sem það sé ekkert fyndið við hlutgervingu kvenna. „Og ég og íslensku stelpurnar mína tökum því ekki af léttúð,“ skrifar María Lilja og vísað til fleiri kvenna sem töldu stólana ósmekklega.

Þar má nefna Albínu Huldu Pálsdóttur sem skrifar: „Þetta er ótrúlega ósmekklegt og niðurlægjandi fyrir konur. Mér finnst þetta ekki vera í samræmi við þá ímynd sem ég hafði af Hótel Rangá.“

Önnur kona, Ragnheiður Júlía Ragnarsdóttir, spyr til hvers sé verið að höfða með svona auglýsingu. „Oj. Til hverra reynið þið að höfða með þessari auglýsingu? Eru „slísí“ og „krípí“ ný einkunnarorð rekstursins?“

Hildur Lilliendahl tekur undir þetta og skrifar: „Einungis körlum tekst að vera krípí og slísí á sama tíma. Guð hvað þið megið fokka ykkur.“