Róbert Árni Hreiðarsson lögmaður eða Robert Downey misnotaði Nínu Rún Bergsdóttur. Frá því greindi hún opinberlega þann 15. júní í kjölfar frétta að Robert hefði hlotið uppreist æru og lögmannsréttindi sín aftur. Bjarni Benediktsson forsætisráðherra var starfandi dómsmálaráðherra þegar sú ákvörðun var tekin. Hefur Bjarni sagt að hann hafi ekki haft aðkomu að málinu en á vef Rúv sagði Bjarni að hann hafi tekið við niðurstöðu úr ráðuneytinu. Sagði Bjarni að ekki væri hægt að láta tilfinningar hafa of mikil áhrif í þessu máli og að ætti að gefa fólki annað tækifæri. Guðni Th. Jóhannesson forseti Íslands skrifaði einnig undir plaggið og kvaðst hann miður sín vegna málsins þegar hann uppgötvaði hver fortíð Roberts var.

Sjá einnig: Var eigandi Skjás eins – Glysgjarni Sjálfstæðismaðurinn sem fékk uppreist æru

Nína Rún er dóttir Bergs Ingólfssonar leikara og leikstjóra. Feðginin hafa gagnrýnt harðlega að Robert hafi hlotið uppreist æru. Þá hafa þau bæði viljað að forsætisráðherra rökstyðji ákvörðunina. Orðrétt sagði Bergur í grein í Fréttablaðinu:

„Fyrst og fremst viljum við heyra rök núverandi forsætisráðherra fyrir því vali sínu að veita einmitt þessum manni uppreist æru en ekki öðrum. Og við hvetjum núverandi dómsmálaráðherra til að gera allt sem í hennar valdi stendur til að taka málið upp að nýju því það virðist hafa farið í gegn án þess að nokkur beri ábyrgð og enginn hafi unnið við það.“

Sjá einnig: Ruth Reginalds Moore er mölbrotin móðir

Nína Rún hefur haldið áfram að kalla eftir viðbrögðum frá Bjarna á Facebook-síðu sinni. Hefur hún í tvígang merkt Bjarna í færslum sínum. Um helgina sagði Nína Rún á Facebook að Bjarni hefði engan áhuga á Druslugöngunni.

Bjarni bakar Bjarna finnst gaman að skreyta kökur og vakti myndband af Bjarna að nostra við afmælisköku mikla athygli fyrir ekki margt löngu

„né að tjá sig um uppreist æru Roberts Downey. En hann er alveg til í að hitta frægt fólk, baka köku, og tísta #dottir þegar hann horfir á landsliðleik. Þurfum við að vera pro í fótbolta svo þú hlustir loksins á okkur Bjarni? Ég er líka #dottir Bjarni! Við erum allar #dottir!“

Aðspurð hvort hún hefði fengið viðbrögð frá forsætisráðherra eftir að hún merkti hann sérstaklega í færslum á Facebook svaraði Nína RÚN:

„Hann hefur ekki sýnt nein viðbrögð eftir að ég „taggaði“ hann í tveimur facebook færslum. Ég var nú ekki að búast við því þar sem hann hefur nú þegar sýnt að hann snýr baki við öllu sem honum finnst óþægilegt, eins og kynferðisofbeldi.“

Nína Rún var erlendis þegar Druslugangan fór fram og gat því ekki tekið þátt. Hún og aðrir þolendur Róberts Árna hafa fengið mikið af skilaboðum og stuðning. Í aðdraganda göngunnar steig svo fjöldi manns fram í fyrsta sinn og sagði frá kynferðisofbeldi sem það hafði orðið fyrir af hendi níðinga og skilaði skömminni.

Munið þið halda áfram að hafa hátt? Hvert er markmið ykkar?

„Við munum halda áfram að hafa hátt þangið til við fáum svör við okkar spurningum. Að fá að vita hvað leiddi til þess að Robert Downey fengi uppreist æru, hverjir skrifuðu undir og afhverju, myndi þýða mikið fyrir mig og mína fjölskyldu og einnig gefa mér einhverskonar sálarró. Sem brotaþoli Roberts finnst mér ég, og við allar, eiga rétt á því. Annað af okkar markmiðum er að koma í veg fyrir að svona gerist nokkurn tíman aftur. Enginn ætti að þurfa að þola að brot gegn manni, brot sem hefur haft langvarandi áhrif, sé bara eytt sísvona. Við viljum eyða því úr lögum að það sé ólöglegt að segja sína eigin sögu ef sá sem á manni brýtur fær uppreist æru. Við viljum gagnrýnið og gegnsætt ferli þegar brotamaður vill komast aftur í yfirburðastöðu í þjóðfélaginu.“

Sjá einnig: Stelpurnar hættar að vera hræddar við Róbert

Þolendur Roberts Downey og fjölskyldur þeirra hafa einnig kallað eftir að fá að vita hvaða tveir „valinkunnu einstaklingar“ líkt og það er orðað hafi mælt með að Robert hlyti uppreist æru. Hafa þau sagt að slíkt ætti að vera opinbert, og ættu þeir einstaklingar ekki að hafa neitt að fela þar sem þeir telji að Robert sé breyttur og betri maður. Þeir hafi því ekkert að skammast sín fyrir. Aðspurð um hvernig hún vilji sjá Bjarna beita sér, svarar Nína:

„Ég vil að hann standi við það sem hann sagði á ráðstefnu HeforShe. Þar sagðist hann standa með konum og jafnrétti, tístir #heforshe og #dottir en svo þegar það kemur að því að standa með okkur þá snýr hann bara við okkur baki. Hvar er jafnréttið Bjarni? Af hverju vill hann ekki hlusta á okkur? Af hverju veitir hann manni sem var dæmdur fyrir að ræna æsku fimm ungra stúlkna og hefur verið kærður af þeirri sjöttu uppreist æru og neitar að tjá sig um það? Hvað gerðist í þessu ferli? Af hverju er öll þessi leynd? Er eitthvað sem hann vill ekki að við komumst að? Maðurinn missti æruna við að brjóta á okkur. Bjarni ætti að sýna okkur þá virðingu og heiðarleika að svara spurningum okkar.“