Nýr sviðsstjóri velferðarsviðs Reykjavíkurborgar, Regína Ástvaldsdóttir, sendi orðsendingu til aldraðra íbúa Seljahlíðar um helgina þar sem fram kom að hún og starfsfólk hennar hörmuðu þá óvissu sem skapast hafði vegna frétta um yfirvofandi 80–125 prósenta leiguhækkun í þjónustuíbúðunum.

„Það sem er alveg öruggt er að leiga mun ekki hækka fyrsta árið, eða ekki fyrr en 1. apríl 2018,“ segir í tilkynningunni. Þá kemur fram að hluti íbúa, sem uppfyllir ákveðin tekju- og eignaviðmið, muni eiga rétt á húsnæðisbótum. „Okkar reynsla er að að tveir þriðju af íbúum í öðrum þjónustukjörnum eigi rétt á slíkum bótum. Við teljum því að sambærileg tala ætti að gilda um Seljahlíð en það þarf að fara yfir málefni hvers og eins til að staðfesta það. Við munum bjóða upp á viðveru félagsráðgjafa á staðnum.“

Í fyrri umfjöllun DV kom fram að íbúar í Seljahlíð hefðu komist að því að íbúðirnar uppfylltu ekki skilyrði í lögum um húsnæðisbætur og það er staðfest í tilkynningunni. „Samkvæmt þeim upplýsingum sem ég hef þá munu íbúðirnar uppfylla skilyrði til að fá húsaleigubætur, eftir að farið hefur verið í breytingar. Það er því rétt sem hefur komið fram að það þarf að setja inn helluborð í þær eldhúsinnréttingar sem eru í íbúðunum til þess að eldunaraðstaðan geti talist fullgild,“ segir í tilkynningu Regínu.

DV óskaði eftir upplýsingum frá Félagsbústöðum hf., sem á og rekur íbúðirnar í Seljahlíð, um hvort kostnaðaráætlun vegna endurbótanna lægi fyrir og hvernig þær verði fjármagnaðar. Í svari frá framkvæmdastjóra fyrirtækisins, Auðuns Freys Ingvarssonar, kom fram að hann bæri ekki traust til blaðamanns til frekari samskipta. Fyrirspurninni er því enn ósvarað.