Lögreglan er búin að fara yfir töluvert mikið af gögnum í tengslum við morðið á Birnu Brjánsdóttur og undirbýr nú að senda málið til héraðssaksóknara. Þrátt fyrir að skipverjinn, sem grunaður er um að hafa banað Birnu, hafi ekki játað aðild að málinu benda öll sönnunargögnin til þess að hann sé sekur.

Þetta kemur fram í Fréttablaðinu í dag. Þar segir Grímur Grímsson, sem stýrir rannsókninni, að honum þyki ekkert ólíklegt að Thomas Møller Olsen eigi einhvern tímann eftir að játa að hafa banað Birnu.

„Engu að síður getum við ekki heimtað játningu. Það er réttur hvers grunaðs manns að tjá sig ekki,“ segir Grímur í samtali við Fréttablaðið.

Þá kemur fram í Morgunblaðinu að Grímur býst ekki við því að dánarorsök Birnu verði gerð opinber fyrr en ákæra hefur verið gefin út í málinu. Þá reiknar hann með því að Thomas verði yfirheyrður í dag.