Halldór Benjamín Þorbergsson, framkvæmdastjóri viðskiptaþróunar Icelandair Group, verður næsti framkvæmdastjóri Samtaka atvinnulífsins (SA). Framkvæmdastjórn Samtaka atvinnulífsins mun greina aðildarsamtökum SA frá ráðningu Halldórs Benjamíns á fundi í Húsi atvinnulífsins í dag, samkvæmt heimildum DV. Til stendur að óbreyttu að tilkynna í kjölfarið opinberlega um nýjan framkvæmdastjóra SA næstkomandi föstudag.

Eiríkur Jónsson greindi fyrst frá því á vef sínum í gærkvöldi að Halldór Benjamín yrði ráðinn framkvæmdastjóri SA.

Meira en sextán vikur eru liðnar síðan Þorsteinn Víglundsson, nú þingmaður Viðreisnar, hætti sem framkvæmdastjóri SA eftir rétt tæp þrjú og hálft ár í starfi. Í auglýsingu samtakanna nú í haust var óskað eftir öflugum einstaklingi með háskólamenntun til krefjandi stjórnunar- og leiðtogastarfa þar sem reynir á frumkvæði, samskiptahæfni, forystuhæfileika og skipulögð vinnubrögð. Umsóknarfresturinn rann út 7. september og hefur ráðningarferlið því tekið um fjórtan vikur.

Halldór Benjamín, sem er hagfræðingur og með MBA-gráðu frá Oxford-háskóla í Bretlandi, var meðal annars fenginn til að kynna skuldaleiðréttingu síðustu ríkisstjórnar í Hörpu í nóvember árið 2014. Þá hafði hann einnig aðkomu að undirbúningi að kynningu á áætlun stjórnvalda um losun fjármagnshafta í júní 2015.

Halldór Benjamín hefur starfað hjá Icelandair Group frá því í ársbyrjun 2010. Formaður framkvæmdastjórnar SA, sem tekur ákvörðun um ráðningu nýs framkvæmdastjóra samtakanna, er Björgólfur Jóhannsson, forstjóri Icelandair Group.

Þá starfaði Halldór Benjamín á árunum 2006 til 2009 sem verkefnastjóri hjá fjárfestingafélaginu Milestone Group. Þar áður hafði hann verið hagfræðingur hjá Viðskiptaráði Íslands.