Helgi Vilhjálmsson í Góu hefur átt mikilli velgengni að fagna í sínum fyrirtækjarekstri. Fyrr í vikunni greindi DV frá því að Helgi malar gull á KFC. Þrátt fyrir mikla velgengni greinir Helgi frá því að hann hafi ekki staðist greiðslumat upp á 17 milljónir króna. Frá þessu sagði Helgi í viðtali á útvarpi Sögu.
Helgi greindi frá því að hann hafi ætlað að aðstoða vin sinn sem átti í vandræðum með að kaupa íbúð.
„Ég ætlaði að hjálpa manni um daginn og honum vantaði nafn á íbúðina sína og það var 17 milljón króna skuld á henni og jú jú við skulum bara segja að hann sé á gráu svæði, og ég segi við hann að bróðir hans gæti reddað þessu en hann sagði nei og ég sagði þá að ég myndi redda þessu, og ég fer í greiðslumat fyrir 17 milljónir og ég komst ekki í gegn um þetta sem venjulegur borgari“
Helgi segist hafa rætt við endurskoðanda sinn og beðið hann að útskýra hvernig á þessu stæði.
„Ég komst ekki í gegnum það, ég skal senda ykkur pappírana og þið sjáið nafnið: Nei nei, Helgi Vilhjálmsson, þetta er stórhættulegur maður. Ég komst ekki í gegnum það á venjulegum grunni.“
Helgi segir fasteignasalana hafa hlegið.
„Þetta er nýja fólkið. Þetta er bréfið sem ég fékk til baka; ég komst ekki í gegnum greiðslumatið. Hugsið ykkur þá venjulegt fólk sem er að reyna að byrja, hvernig það er tekið í nefið,“ bætti Helgi við ósáttur. „Ég get rifið kjaft en ég komst ekki í gegnum það einn tveir og þrír og þetta voru 17 milljónir. Svo er búið að banna manni að skrifa upp á fyrir menn. Það er líka bannað. Hvernig á ungt fólk að bjarga sér?“
