Edda Heiðrún Backman, einn ástsælasti leikari þjóðarinnar er látin. Edda var einnig leikstjóri og myndlistarmaður. Hún lést á Landspítalanum í Fossvogi 1. október. Hún var 58 ára gömul. Þetta kemur fram á vef Morgunblaðsins.
Edda fæddist á Akranesi þann 27. Nóvember árið 1957. Á vef Mbl segir að Edda hafi átt farsælan feril sem leikari til ársins 2004 en hún varð að hætta að leika eftir að hafa greinst með MND-sjúkdóminn. Hún sneri sér þá að leikstjórn og kom að fjölda sýninga í Þjóðleikhúsinu og Borgarleikhúsinu. Þá sneri Edda sér að myndlist og málaði stórfenglegar vatnslitamyndir með munninum. Hélt hún fjölda sýninga á verkum sínum. Fyrst þegar Edda fékk þær fréttir að hún væri með MND sjúkdóminn langaði hana til að deyja. Hana langaði ekki að segja neinum frá þessum sorglegu fregnum.
,,En sem betur fer gekk ég ekki í sjóinn,“ sagði Edda og ákvað síðan að gefast ekki upp og reyna að lifa með sjúkdómnum. Hún sagðist þó ekki líta á sig sem hetju og sagðist ,,bara vera venjuleg kona“ en það verður að teljast ólíklegt að fólk sé sammála því. Edda var engin venjuleg kona svo mikið er víst.
Edda Heiðrún lætur eftir sig tvö börn, Arnmund Ernst leikara og Unni Birnu menntaskólanema.
Eddu verður minnst sem ein af bestu leikkonum sem við höfum átt og þá barðist hún ötullega fyrir réttindum fatlaðs fólks.
