„Og bara svo þú fattir örugglega hvern ég er að kalla fávita þá er ég að tala við þig, þú sem ert í Þjóðfylkingunni, þú sem ert í Hermönnum Óðins, þú sem mættir á Austurvöll að mótmæla brúnu fólki og gast ekki gubbað uppúr þér heillri brú til að rökstyðja þitt mál þegar fjölmiðlar gáfu sig á tal við þig. Þú sem að felur þig bakvið gardínur og bölvar innflytjendum. Þú ert lítill. Þú ert lítill og hræddur,“ segir Hugleikur Dagsson, listamaður og grínisti, í Facebook-færslu sem hann birti nú í morgun.

Færslan er skrifuð til stuðningsmanna Íslensku þjóðfylkingarinnar og annarra sem vilja takmarka komu innflytjenda hingað til lands og rökstyðja afstöðu sína með tilvísunum í íslenska þjóðmenningu og verndun fullveldis Íslands. Spyr Hugleikur þá sem eru á slíkri skoðun hvers vegna þeir séu svo hræddir við útlendinga.

„Afþví þau borða öðruvísi mat og tala furðulega? Halló, við borðum á aktu taktu og syngjum ó mig langar uppá þig. Við erum ekkert betri. Landamæri eru bara einhver strik sem löngu dauðir kallar drógu í sandinn. Trúarbrögð eru bara ólík ævintýri með sama boðskap. Við erum öll sama fokking apategundin á sömu fokkin moldarkúlunni. Hættum þessu rugli, byggjum geimskip og finnum aðra apa til að leika við. Ég veit ég hljóma eins og einver nýaldarhippi en það er betra en að vera fáviti,“ segir Hugleikur og heldur áfram:

„Ég gæti þóst hissa á því að svona fávitaskapur tíðkist hér á landi en ég er það ekki. Því engin þjóð er betri en önnur. Allar þjóðir, lönd, menningarsvæði og trúarbrögð geta framleitt fávita eins og þig. Fávitaskapur hefur ekkert með landafræði/litarhaft/trúarbrögð að gera en allt með ótta að gera. Ekki vera hræddur. Það er enginn að fara að sprengja okkur eða klæða okkur í burkini. Við erum bara Ísland. Öllum er sama um okkur. Af hverju ekki að hleypa öðrum að? Við getum ekki riðið frændfólki okkar forever.

Og hættu að fela þig bakvið tjáningafrelsi. Bara vegna þess að þú mátt segja það sem þú ert að segja gerir þig ekkert að minni fávita. Fávitar elska tjáningafrelsi. Ég meina kommon, þessi pistill er tjáningarfrelsi. Þannig að ekki kommenta einhver öngstrætisrök um að ég sé að banna þér að vera fáviti. Þú hefur jafn mikinn rétt á að vera fáviti og hef rétt á að kalla þig fávita. Þannig virkar tjáningarfrelsi. Fáviti.

Ég fatta núna að ég er ekki að hjálpa umræðunni með svona aggressívum pistli. Að mæta hatri með heift er í raun frekar fávitalegt af mér. Ég skal hætta. En nennir þú þá líka að hætta? Það er ekki of seint. Húðflúraðu pulsu við hliðina á SS tattúinu þínu. Hlustaðu á pönk og hip hop. Horfðu á Star Trek og lærðu að Klingonar og Vúlkanir geta verið vinir. Í alvöru, þú ert örugglega fínn gaur. Komdu hérna. Knúsaðu mig.“