Þorgerður Katrín Gunnarsdóttir, fyrrverandi ráðherra og varaformaður Sjálfstæðisflokksins, hefur staðfest að hún sé gengin til liðs við Viðreisn eins og DV greindi fyrst frá í gær.

Þetta gerði Þorgerður á Twitter-síðu sinni þar sem hún tilkynnir einnig að Þorsteinn Pálsson sé gengin til liðs við flokkinn.

Í frétt DV á þriðjudag kom fram að Þorgerður muni leiða lista flokksins í Suðvesturkjördæmi, eða Kraganum svonefnda.

Þorgerður sat á Alþingi frá 1999 til 2013 en hún var menntamálaráðherra frá 2003 til 2009. Þá var hún varaformaður Sjálfstæðisflokksins frá 2005 til 2010.

Þorsteinn var þingmaður og ráðherra Sjálfstæðisflokksins um margra ára skeið. Hann var þingmaður árin 1983 til 1999 og var fjármálaráðherra árin 1985 til 1987, forsætisráðherra árin 1987 til 1988 og dóms- og kirkjumálaráðherra árin 1991 til 1999. Þá var Þorsteinn formaður Sjálfstæðisflokksins árin 1983 til 1991.

Á vef RÚV kemur fram að Þorsteinn muni ekki fara í framboð fyrir Viðreisn. Segist hann hafa tekið þá ákvörðun að styðja við framboðið og þann fjölbreytta hóp sem þar er.