„Þessi stund breytti lífi mínu,“ hefur CBC News eftir Robbie Rousseau, formanni Íslendingadagsins, Íslandshátíðinni í Manitoba í Kanada. Rousseau er af íslenskum ættum og heimsótti Ísland til að fylgjast þar með fyrstu leikjunum á mótinu. Hann segir ógleymanlegt að hafa verið í Reykjavík þegarÍslendingar skoruðu fyrsta markið sitt á mótinu. „Borgin hreinlega titraði, svo mikil voru lætin.“

Rousseau er staddur í Gimli, stærsta samfélagi Íslendinga utan Íslands, og segir að þar sem stemmingin engu lík. „Ég held að annar hver íbúi sé að flytja sjónvarpið sitt út á götu til að geta notið veðurblíðunnar á þessum fallega degi,“ segir hann hlæjandi við CBC.

Hann segir að út um allan bæ séu menn að skipuleggja samkomur. Hann segir að liðið hafi sannað gegn Englandi að margur sé knár þótt hann sé smár. „Þetta er þessi íslenska þrjóska og ákveðni. Við höldum alltaf að við getum slegið stærri þjóðum við og við eigum skilið að vera komnir svona langt,“ segir hann um íslenska ævintýrið.

„Við munum mæta Þjóðverjum,“ segir hann kokhraustur og spáir Íslandi í undanúrslit. „Frakkar eru bara næsta þjóð á tékklistanum.“