„Þetta var ótrúlega skemmtileg tilviljun,“ segir Júlíus Júlíusson, framkvæmdastjóri á Dalvík. Það var á mánudag sem hann hitti fyrir franskan ferðamann á Dalvík, sem heitir Dalvík.

Að sögn Júlíusar var móðir mannsins pennavinkona Árdísar Fjólu Jónmundsdóttur, íbúa á Dalvík á árum áður. „Vorið 1994 kom móðir hans svo hingað í heimsókn ásamt kærasta sínum og þau dvöldu hér í bænum í vikutíma, fóru meðal annars til Grímseyjar og lentu óvænt í fermingarundirbúningi,“ segir Júlíus. Fólkið varð mjög hrifið af bænum og þegar þau eignuðust son um haustið fékk hann nafnið Dalvik Loger í höfuðið á íslenska þorpinu sem heillaði franska parið svo mjög.

Það var síðan fyrir einskæra tilviljun að Júlíus rakst á hinn 21 árs gamla Dalvik síðastliðin mánudagsmorgun í Menningarhúsinu Bergi á Dalvík en þar rekur Júlíus kaffihús. „Hann kom hérna inn til að leita að hraðbanka og starfsmaður bókasafnsins aðstoðaði hann. Hann er ljósmyndari og lét hana hafa nafnspjaldið sitt og þannig kom þetta í ljós,“ segir Júlíus jafnframt og bætir við að um leið og starfsmaðurinn hafi komið til hans og sagt honum frá því hver væri staddur í húsinu þá hafi sagan eftirminnilega rifjast upp fyrir honum.

Í ljós kom að Dalvik var á tíu daga ferðalagi um Ísland. „Mér skildist á honum að þetta væri svona tiltölulega óskipulögð ferð en vitanlega hafi það verið planað að koma til Dalvíkur og sjá staðinn sem hann er skírður í höfuðið á. Hann var samt ekki búinn að vera í sambandi við neinn hérna í bænum heldur kom hann bara alveg óvænt,“ segir Júlíus en vel fór á með þeim tveimur.