Davíð Oddsson ritstjóri Morgunblaðsins staðfesti í morgun að hann ætlar í forsetaframboð. Davíð tilkynnti um ákvörðun sína í Sprengisandi á Bylgjunni.

Davíð var ráðinn ritstjóri Morgunblaðsins haustið 2009 og hefur gegnt því starfi síðan þá. Hann ætlar að taka sér frí frá störfum til að einbeita sér að framboðinu. Ákvörðun Davíðs hefur vakið mikla athygli. Egill Helgason fer yfir framboðið og reifar málin og telur líklegt að framboð Davíðs geti orðið til þess að tryggja Guðna Th. Jóhannessyni sæti á Bessastöðum. Egill segir:

„Tveir pólitískir átakamenn, Ólafur Ragnar Grímsson og Davíð Oddsson, standa á palli á framboðsfundi fyrir forsetakosningar. Þeir hafa verið í pólitík síðan upp úr miðri síðustu öld. Þjóðin horfir á og er dálítið hissa á að þeir skuli ekki geta hætt.“
Egill heldur áfram:

„Með þeim er ungur maður sem hefur ekki komið nálægt stjórnmálum, fræðimaður, fjölskyldumaður sem á ung börn. Hann er broshýr, í málfutningi hans er bjartsýnistónn og hann er laus við undirferli.“

Segir Egill að Davíð hafi jafnvel með þessu verið að tryggja kjör Guðna sem forseta. Honum þurfi að verða verulega mikið á til að koma ekki fyrstur í mark.

„Gömlu karlarnir munu mikið tala um reynsluleysi Guðna, en satt að segja virðist hann fær í flestan sjó. Vinsælustu forsetar Íslands, Kristján Eldjárn og Vigdís Finnbogadóttir, komu líka úr störfum úti í samfélaginu og beint á Bessastaði.“