„Ég gagnrýni aðallega að allt sé sett úr skoðrum. Það er eins og kerfið hjá félaginu sé ekki undir þetta búið“ segir varaformaður þingflokks VG, Bjarkey Olsen Gunnarsdóttir um nýjan flugvélaflota Flugfélags Íslands.

Bjarkey segist hafa ferðast einu sinni með einni af nýju flugvélum flugfélagsins, það hafi verið ferðin þar sem hafi þurft að nauðlenda í Keflavík. „Ég ferðast að minnsta kosti tvisvar sinnum í viku, það er mikið sama fólkið, margir eru ekki sáttir.“

Að sögn Bjarkeyjar ferðast hún með samstarfsfélaga tvisvar í viku, sem sé frekar flughrædd. „Tilfinning fólks er eins og þetta sé ekki traustvekjandi. Dóttir mín flaug norður núna í gær og flugvélin hennar átti að koma klukkan hálf níu en kemur ekki fyrr en um um miðnætti.“ Í samtali við blaðamann sagði Bjarkey að þegar Fokker-vélarnar voru teknar í gagnið, þá hafi verið svipaðir byrjunarörðugleikar. Samt sem áður þurfi að gera betur. „Flugfélagið segir að þeir séu klárir með þetta, en það virkar á mann eins og svo sé ekki,“ segir Bjarkey að lokum.

Ekki náðist í Árna Gunnarsson, framkvæmdastjóra Flugfélags Íslands vegna málsins.

Nýjar flugvélar Bombardier Q400 hjá Flugfélagi Íslands