Heilbrigðisráðherra, Kristján Þór Júlíusson, sagði í samtali við Morgunútvarpið á Rás 2 í morgun að vinnubrögð forsætisráðherra, Sigmundar Davíðs Gunnlaugssonar, og Framsóknarflokksins, séu ekki boðleg í sambandi við staðsetningu nýs spítala. Kristján Þór segist hafa fyrst heyrt af staðsetningu spítalans á Vífilsstöðum í fjölmiðlum á föstudaginn.

Sigmundur Davíð lýsti því yfir síðastliðinn föstudag að Landspítalinn ætti að vera annarsstaðar en við Hringbraut og hefur í því samhengi nefnt Vífilsstaði í Garðabæ.
Kristján segir að hann, sem og Bjarni Benediktsson fjármálaráðherra, hafi báðir heyrt fyrst af málinu síðastliðinn föstudag og gagnrýnir forsætisráðherra og flokkssystkini hans. Kristján segir að ekki sé boðlegt að vinna með þessum hætti að viðkvæmum flokki eins og heilbrigðismálin séu.

„Við sjáum þess ágætlega stað í því ákalli sem að almenningur í þessu landi er að senda stjórnmálum, ekki bara ríkisstjórninni heldur Alþingi öllu. Áttatíu og fimm þúsund manns eru búin kalla eftir því að við stöndum betur vörð um heilbrigðismálin í þessu þjóðfélagi.“

Kristján segir stjórnvöld vera byrjuð að svara ákallinu.

Vorið 2014 sagði forsætisráðherra á Alþingi að engin ákvörðun hafi verið tekin um að byggja nýjan Landspítala við Hringbraut. Menn hafi verið með misjafnar skoðanir, en Hringbraut hafi þó alltaf verið upphaflega staðsetningin. Vegna þessarra ólíku sjónarmiða hafi frekar verið ákveðið að ráðast í endurbætur á meðan aðrir kostir yrði metnir.
Kristján Þór segir að öruggt sé að Landspítalinn verði við Hringbraut. Það hafi verið ákveðið á Alþingi árið 2010 og endanlega staðfest árið 2013.