Skotveiðimenn hvekktir eftir stofnun Vatnajökulsþjóðgarðs – „Við vonum að annað slíkt ævintýri sé ekki í farvatninu“
„Við í sjtórn Skotvís mátum það svo að þessi bolti færi af stað hvort sem okkur líkaði betur eða verr. Við ákváðum því að vera með frá byrjun sem málsvari skotveiðimanna í þessum hópi,“ segir Dúi Landmark, formaður Skotvís, Skotveiðifélags Íslands.
Skotvís er á meðal þeirra félaga sem undirritar viljayfirlýsingu náttúruverndarhreyfingarinnar, útivistarsamtaka og Samtaka ferðaþjónustunnar um stofnun þjóðgarðs á miðhálendi Íslands, þrátt fyrir að reynsla skotveiðimanna af stofnun Vatnajökulsþjóðgarðs sé ekki góð. Ekki eru nema fimm ár liðin síðan stjórn Skotvís sendi frá sér yfirlýsingu þar sem félagið harmaði þá ákvörðun þáverandi umhverfisráðherra, Svandísar Svavarsdóttur, að samþykkja verndar og stjórnunaráætlun Vatnajökulsþjóðgarðs án breytinga. Samþykktin fól í sér miklar takmarkanir á veiðum á hreindýrum, gæsum og rjúpum á helstu veiðisvæðum innan þjóðgarðsins.
Markmiðið með viljayfirlýsingunni nú er að ná sem víðtækastri samstöðu um verndun miðhálendis Íslands með stofnun þjóðgarðs í eigu íslensku þjóðarinnar. Dúi segir í samtali við DV að sporin hræði vissulega þegar komi að stofnun þjóðgarða. Veiðimenn hafi við stofnun síðasta þjóðgarðar borið mjög skarðan hlut frá borði. „Þar var gengið á rétt okkar í hvívetna.“
Hann segir að að þessu sinni hafi Skotvís verið kallað að borðinu frá upphafi. „Grunnlínan í okkar skilaboðum er að réttur veiðimanna innan þjóðgarðsins verði ekki skertur frá því sem nú er. Við erum með undir þeim formerkjum.“ Hann segir aðspurður að einhugur hafi verið um þessa ákvörðun innan stjórnar Skotvís en að hann skilji að veiðimenn – sem eru um 10 þúsund – séu margir hvekktir. „Margir skotveiðimenn eru mjög með varann á sér og telja þetta geta brugðið til beggja vona. Okkur fannst hins vegar réttar að vera með og tala máli skotveiðimann.“
En er hann bjartsýnn á að veiðimenn haldi rétti sínum, verði þjóðgarður stofnaður um allt miðhálendi Íslands? „Ég er bjartsýnn þar til annað kemur í ljós. Hann segir að fleiri félög séu aðilar að viljayfirlýsingunni sem hafi það að markmiði að standa vörð um hagsmuni íslensks útivistarfólks. Um sé að ræða frumkvæði grasrótarinnar, ólíkt því þegar Vatnajökulsþjóðgarður var stofnaður. „Okkar málflutningi var vel tekið en maður veit aldrei hvað gerist þegar þetta fer til hins opinbera. Hér hefur verið vandað meira til verka en við stofnun Vatnajökulsþjóðgarðs. Við vonum að annað slíkt ævintýri sé ekki í farvatninu. Það er okkar hlutverk sem hagsmunasamtök skotveiðimanna að tala okkar málstað og að hann heyrist.“
Í fréttatilkynningu vegna viljayfirlýsingarinar segir að samkvæmt skoðanakönnun Gallup (apríl, 2015) séu yfir 60% landsmanna fylgjandi stofnun þjóðgarðs á miðhálendinu og einungis 13% andvíg.
