Þingmennirnir sem minnst hefur borið á – Stjórnarliðar tala minnst
Þeir þingmenn sem minnst hefur borið á síðastliðna átján mánuði eru allir þingmenn stjórnarflokkanna, Framsóknarflokksins og Sjálfstæðisflokksins. Þetta kemur fram í ítarlegri úttekt Eyjunnar sem birt var í helgarblaði DV.
Eyjan tók saman lista yfir þá þingmenn sem minnst þykir hafa borið á. Var það gert með því að kanna þann tíma sem þeir hafa eytt í ræðustól Alþingis á yfirstandandi þingi, frá því í septemberbyrjun 2015 og til mánudagsins 22. febrúar síðastliðinn. Þá var leitað eftir því hversu mörg þingmál þingmenn hefðu lagt fram, þingsályktunartillögur, frumvörp, fyrirspurnir auk annars. Stuðst var við síðu Alþingis í þeim efnum. Auk þess var lauslega farið yfir hversu mikið hefur borið á þingmönnum í fjölmiðlum á yfirstandandi þingvetri.
Í úttektinni kemur margt athyglisvert fram. Þannig hafa þingmenn Samfylkingarinnar verið duglegir í ræðustól Alþingis það sem af er vetri. Munar þar mest um Össur Skarphéðinsson sem talað hefur næstmest á því tímabili sem um er rætt, eða í tæpar 17 klukkustundir. Mest hefur Bjarkey Olsen Gunnarsdóttir talað, eða í rúmar 17 klukkustundir.
Þórunn Egilsdóttir, þingmaður Framsóknarflokksins, hefur talað minnst, eða í rúmar 33 mínútur. Þar á eftir kemur Líneik Anna Sævarsdóttir, einnig Framsóknarflokki, með 50 mínútur og þar á eftir Valgerður Gunnarsdóttir, Sjálfstæðisflokki, með tæpa 51 mínútu. Þórunn hefur tekið 38 sinnum til máls, Líneik Anna 25 sinnum og Valgerður 41 sinni. Fjórði þingmaðurinn sem hefur talað í minna en klukkustund er Haraldur Einarsson, Framsóknarflokki, með 51 mínútu og 14 ræður. Enginn þessara þingmanna hefur lagt fram þingsályktunartillögu sem fyrsti flutningsmaður, en Þórunn hefur lagt fimm slíkar fram sem meðflutningsmaður.
Í umfjöllun Eyjunnar eru fleiri þingmenn tíundaðir. Þannig hefur hinn reynslumikli Birgir Ármannsson, Sjálfstæðisflokki, lítið haft sig í frammi. Hann hefur talað í rúma klukkustund og tekið 23 sinnum til máls. Hann hefur ekki lagt fram neina þingsályktunartillögu og ekki heldur neitt frumvarp. Haraldur Benediktsson, Sjálfstæðisflokki, hefur talað í 1 klukkustund og 18 mínútur, en ekki lagt fram neina þingsálykunartillögu sem fyrsti flutningsmaður. Þá hefur hann ekki lagt neitt frumvarp fram og lagt fram eina fyrirspurn til skriflegs svars. Höskuldur Þórhallsson, Framsóknarflokki, hefur talað í 1 klukkustund og 25 mínútur og tekið 41 sinni til máls. Hann hefur ekki lagt fram neina þingsályktunartillögu, en eitt frumvarp, skipulags- og mannvirkjamál millilandaflugvalla sem hann lagði fram í síðustu viku. Þetta sama frumvarp lagði hann fram á síðasta þingi. Loks er Hanna Birna Kristjánsdóttir, Sjálfstæðisflokki, nefnd. Hún hefur talað í 1 klukkustund og 25 mínútur og tekið 31 sinni til máls. Hún hefur ekki lagt fram neina þingsályktunartillögu, ekkert frumvarp og enga fyrirspurn.
