Ráðamenn Norður-Kóreu halda því fram að vetnissprengja hafi verið sprengd í tilraunaskyni í landinu í dag.

Tilkynningin kom eftir að jarðskjálfti upp á 5,1 á richter mældist í landinu, en það var tilkynnt um tilraunasprenginguna í fréttatíma á ríkisstöð Norður-Kóreu.

Sprengingin á að hafa átt sér stað í Punggye-ri, sem er ekki svo langt frá landamærum Kína.

Vetnissprengja er mun öflugri heldur en atómsprengja, en neyðarfundur hefur verið boðaður í öryggisráði Sameinuðu þjóðanna vegna tilraunarinnar.

Samkvæmt umfjöllun BBC um málið þá geta liðið vikur eða mánuðir þar til það er mögulegt að sannreyna orð ráðamanna í Norður-Kóreu og því ekki hægt að segja með vissu hvort að þarna hafi vetnissprengja verið sprengd.

Kim Jong-un tilkynnti í síðasta mánuði að Norður-Kórea hefði náð að smíða vetnissprengju, en sérfræðingar voru og eru efins.

Þetta var fjórða kjarnorkutilraun Norður-Kóreumanna frá árinu 2006 og hafa tilraunirnar verið dýrkeyptar fyrir landið sem er einangraðasta ríki veraldar. Þannig hefur hjálparaðstoð verið takmörkuð og viðskiptaþvinganir auknar.

Ofan á allt annað þá hefur Norður-kórea skotið flugskeytum úr kafbátum í tilraunaskyni en það gerir það að verkum að viðvörunartími fyrir árás, til að mynda á vesturströnd Bandaríkjanna, yrði mun minni, og hafa Bandaríkjamenn töluverðar áhyggjur af þessu. Ekki síst í ljósi þess að vetnissprengja er nokkuð lítil og meðfærileg og henni fylgir gífurleg tortíming.

Á meðal þeirra þjóða sem hafa áhyggjur af þróun mála eru nágranna Norður-Kóreu, Kínverjar, sem hafa hingað til haldið hlífiskildi yfir grönnum sínum og aðstoðað ríkið á margan hátt. Japanir eru einnig áhyggjufullir en forsætisráðherra landsins sagði tilraunina alvarlega ógn við öryggi íbúa landsins.