Sveinn Rúnar Hauksson, læknir og formaður félagsins Ísland-Palestína, fer á fund Mahmoud Abbas, forseta Palestínu, síðar í dag. „Mér skilst að til standi að heiðra mig og gera mig að heiðursborgara í Palestínu,“ segir Sveinn Rúnar á Facebook-síðu sinni.

„Ef af verður get ég ekki annað en þakkað af auðmýkt en jafnframt lít ég svo á að þessi heiður sé sýndur Félaginu Ísland-Palestína og öllum þeima aragrúa Íslendinga sem stutt hafa réttmæta baráttu palestínsku þjóðarinnar fyrir rétti sínum, friði og mannréttindum, þar með talið Alþingi. Til hamingju, öll sömul. Látum þetta verða hvatningu til áframhaldandi samstöðu,“ segir Sveinn Rúnar en fjölmargir hafa óskað honum til hamingju á Facebook-síðu sinni.