Kristján Markús Sívarsson yfirheyrður – Safnað fyrir son konunnar
Andlát íslensku konunnar sem lést í borginni Algeciras á Spáni 16. september síðastliðinn er nú rannsakað af lögreglunni á Spáni sem eitrun samkvæmt ræðismanni Íslands á Malaga, Per Dover Petersen. Í samtali við DV segir hann að nú sé beðið eftir niðurstöðum eiturefnaskimunar en kærasti konunnar, Kristján Markús Sívarsson, hefur verið yfirheyrður af lögreglu á Spáni. Per Dover segist ekki vita hvort Kristján Markús hafi stöðu grunaðs aðila. Konan, sem var rétt rúmlega tvítug, hefur glímt við fíkniefnavanda um nokkurt skeið. Tveggja ára sonur hennar er nú í umsjón foreldra hennar.
„Í öllum svona tilvikum þá fer í gang rannsókn hjá lögreglunni hér. Lögreglu grunar að um eitrun hafi verið að ræða, annað hvort af hennar eigin hendi eða af öðrum aðila,“ segir Per Dover. DV gerði ítrekaðar tilraunir til að fá upplýsingar um stöðu rannsóknar hjá lögregluyfirvöldum á Spáni, en var ávallt bent á að ræða við ræðismann Íslands. Þau svör fengust þó að málið væri á borði rannsóknarlögreglunnar. Per Dover segir að nú sé beðið eftir niðurstöðu úr eiturefnaskimun. „Krufning liggur fyrir en beðið er eftir niðurstöðu úr eiturefnaskimuninni. Dómari hér mun svo ákveða framhaldið. Ég get ekki staðfest hvaða eitur varð henni að bana en ég get staðfest að einhvers konar eitur dró hana til dauða,“ segir Per Dover.
Orð Pers Dover stangast á við orð Urðar Gunnarsdóttur en hún sagði á dögunum að málið væri ekki rannsakað sem grunsamlegt dauðsfall. Spurð um þetta svarar Urður nú að orð hennar hafi miðast við þær upplýsingar sem lágu fyrir þá. Í samtali við DV segir hún að sé málið nú sakamál þýði það að aðkoma utanríkisráðuneytisins sé lítil sem engin, nema sérstaklega sé óskað eftir því. „Við erum að aðstoða fjölskyldu hennar,“ segir hún.
Líkt og fyrr segir var kærasti konunnar Kristján Markús Sívarsson, en hann á langan afbrotaferil að baki og er grunaður í sérstaklega hrottalegri frelsissviptingu og líkamsárás sem átti sér stað í heimahúsi í Vogum á Vatnsleysuströnd síðastliðinn ágústmánuð. Per Dover segir að hann hafi verið yfirheyrður af lögreglu á Spáni vegna andláts konunnar. „Hann hefur verið yfirheyrður. Ég er hins vegar ekki alveg viss um hvort hann sé grunaður eður ei. Við höfum ekki verið beðin um aðstoð vegna þess svo ég veit lítið um það,“ segir Per Dover. Að hans sögn átti andlátið sér stað á litlu hóteli í Algeciras. Hann segir sömuleiðis að Kristján Markús hafi tilkynnt um andlát konunnar, en hún var úrskurðuð látin á vettvangi.
Ættingjar og vinir konunnar hafa síðastliðna viku tjáð á samfélagsmiðlum þann mikla harm sem býr í brjósti þeirra. Konan hafði háð langa baráttu við vímuefnasýki og hafði margoft reynt að snúa við blaðinu. Fjölskylda konunnar hefur beðist undan viðtali, en hefur þess í stað bent á samtökin Olnbogabörn. Samtökin voru stofnuð fyrir aðstandendur barna með áhættuhegðun. Ættingjar konunnar hafa komið á stað söfnun fyrir dreng hennar.
