Sandra Birna er 27 ára tveggja barna móðir. Hún hefur brennandi áhuga á öllu tengdu heimilislífi, skipulagi, útivist og hreyfingu. Hún er bloggari á Lady.is og skrifaði nýlega færslu um breytingar sem hún gerði á baðherberginu. Sandra Birna gaf Bleikt góðfúslegt leyfi til að deila pistlinum og myndunum áfram með lesendum. Við gefum henni orðið:
Þegar við ákváðum að kaupa nýju íbúðina okkar, þá var planið alltaf að gera baðherbergið 100% upp á nýtt, enda lítið búið að gera fyrir það frá upphafi.
En eftir því sem við ræddum þetta meira, kom í ljós að okkur Smára langaði báðum jafn mikið í rúmgóða flísalagða sturtu í staðinn fyrir að hafa baðkar. En það sem truflaði það voru börnin og það hve gaman það er fyrir þau að fara í bað frekar en sturtu, sérstaklega fyrir 1 árs barnið á heimilinu.
Niðurstaðan var því að geyma heljarinnar breytinguna í kannski 2 ár eða þangað til að Viktor Fannar verður orðinn nógu stór til að fara sjálfur í sturtu. Í staðinn máluðum við allt baðherbergið upp á nýtt og skiptum um innréttingu, en hún er bara klassísk úr IKEA.
Þessi breyting munar svo miklu en kostaði samt ekki nema rétt um 80.000 kr með öllu.
Innréttingin sem var á baðinu þegar við keyptum.
Sú innrétting er grunn og stendur laus á gólfinu í kringum vaskinn, en ástæðan var sú að hurðin inn á bað snéri vitlaust miðað við teikningar en því breyttum við til að fá betri innréttingu þarna inn.
Nýja innréttingin er klassísk GODMORGON skápur með ODENSVIK vask, en við gátum svo notað áfram sömu blöndunartækin.
Máluðum svo baðherbergið í sama gráa lit eins og við erum með inn í stofu hjá okkur en það er Kósý Grár úr Slippfélaginu.
Mér finnst alltaf gaman að skoða fyrir/eftir myndir – svo vonandi hafa fleiri gaman af.
Nú eru nýja heimili loksins að verða tilbúið og hlutir búnir að fá sína staði, svo hver veit nema ég gefi ykkur meira innlit frá heimilinu á næstu mánuðum en hugurinn fer þessa dagana í hringi með hvernig best skuli gera það sem eftir er.
Þið finnið mig á instagram undir sandrabirna
