Áhorfendur raunveruleikaþáttarins Supernanny áttu erfitt með að halda aftur tárunum síðastliðið mánudagskvöld. Í þættinum heimsótti súperfóstran Jo Frost átta manna fjölskyldu. Hún grátbað stjúpföðurinn um að hætta að leggja hendur á elsta drenginn sem missti nýlega föður sinn.
Í nýjasta þætti Supernanny báðu foreldrarnir Ralph og Brittany um aðstoð Jo við að aga börnin þeirra sex.
Brittany sagði í þættinum að hegðun barnanna hennar hafi versnað til muna eftir að fyrrverandi eiginmaður hennar, og faðir barnanna, hafi látist í bílslysi nokkrum mánuðum áður.
Brittany var gift Archie í tíu ár og eignaðist með honum þrjú börn áður en þau skildu. Hún og Ralph eiga saman þrjú börn. Foreldrarnir sögðu að síðan Archie dó hafa þrjú elstu börnin byrjað að ljúga að þeim, stríða hvort öðru og sýna þeim vanvirðingu.
Í þættinum viðurkenndi Ralph að hann notaði ofbeldi til að refsa elsta drengnum, Braylon.
Braylon er tíu ára og sagði við Jo að stjúpfaðir hans „kemur inn og lemur mig“ þegar hann hagar sér illa. Hann sagði að stjúpfaðir hans notar oftast höndina eða tréspaða.
Jo hélt utan um Braylon á meðan hann grét. „Hann lemur mig oftast á fótleggjunum,“ sagði hann í gegnum tárin.
Þetta átakanlega atriði hafði mikil áhrif á áhorfendur sem tjáðu sig um þáttinn á samfélagsmiðlum. Fjöldi sagðist hafa átt erfitt með að halda aftur tárunum.
Catching up on #SupernannyUSA and I’m bawling. @Jo_Frost has this very special way of ‘seeing’ children, even parents, who feel completely unseen or misunderstood ❤️
— Amy (@Burtini) August 3, 2020
I cannot cope with this #SuperNanny! All he needed was a hug from someone, the way he sunk into @Supernanny literally shatterd my heart!😭😭
— Sarah Jane Clarke (@sarahjannee) August 3, 2020
Í þættinum bað Jo um að fá að sjá tréspaðann sem er notaður til að lemja Braylon. Brittany, móðir Braylon, brotnaði niður þegar hún rétti henni tréspaðann og Jo grátbað Ralph, stjúpfaðirinn, um að leggja ekki hendur á hann aftur.
„Þessi börn þurfa hjálp við að syrgja. Það er verið að biðja ykkur um að sýna meiri þolinmæði. Ofbeldi er aldrei svarið. Þið eigið aldrei eftir að geta byggt upp heilbrigt samband við börnin ykkar ef þið ákveðið að lemja þau,“ sagði Jo.
„Ef þið viljið ala upp börn sem sýna ykkur virðingu, þá þurfa þau að virða sig sjálf fyrst.“
