Sævar Helgi Bragason, Stjörnu-Sævar, hefur barist ötullega fyrir bættri vitund landsmanna um loftslagsvána, en smá bakslag kom í baráttuna um helgina þegar að hann var sakaður um að birta villandi tölfræði um kjötát. DV ákvað því að lesa í tarotspil Stjörnu-Sævars og athuga hvað framtíðin ber í skauti sér. Lesendum DV er bent á að þeir geta sjálfir dregið spil á dv.is.
Fyrsta spilið sem kemur upp er Stafagosi. Það táknar persónu sem stendur Sævari nærri. Hér er á ferðinni lífleg manneskja sem færir honum skemmtilegar stundir og ekki síður spennu. Persónan sem um ræðir er mjög glaðleg og nýtur þess að spjalla. Hugsanlega er þetta maki, en þessi manneskja mun færa Sævari góðar fréttir innan tíðar. Þessar fréttir gætu þýtt miklar breytingar í lífi Sævars og ný tækifæri gætu skapast. Þá er Sævar nýbyrjaður á verkefni sem á eftir að takast virkilega vel og fyllist hann orku og metnaði við vinnslu þess.
Næst er það Stjarnan. Það umlykur Sævar mikill friður og vellíðan. Hann hefur fullkomna stjórn á tilveru sinni og kann upp á tíu þá list að miðla málum. Hann er að ganga inn í mjög jákvætt tímabil sem einkennist af velgengni. Hann á að hafa arminn opinn fyrir tækifærum og mun hann senn fá veigamikla viðurkenningu, eitthvað sem hann hefur dreymt um.
Þá er það Töframaðurinn. Sævar sækir andlegan og líkamlegan mátt ómeðvitað til æðri máttarvalda og á sama tíma úr umhverfi sínu. Sjálfsöryggi, skipulag og agi einkennir hann og mun hann virkja drauma sína innan tíðar. Það eru ekki síst vitsmunir hans og hæfileikar í mannlegum samskiptum sem munu koma honum á áfangastað. Sævari er ráðlagt að nota alla sína góðu kosti til að koma hugsunum sínum í verk sem fyrst.
