Angel Durr, 25 ára, er komin átta mánuði á leið með sitt fyrsta barn og kallar sig stærsta nískupúka Texas. Hún leitar í ruslagámum og hefur gert það síðan hún man eftir sér. Móðir hennar leitaði í ruslagámum og amma hennar gerði það líka. Angel segir þetta vera henni í blóð borið að leita að gersemum í rusli annarra.
„Sumir líta á þetta, að leita í ruslagámum (e. dumpster diving), sem sport. Ég sé það ekki þannig. Ég sé þetta sem eitthvað sem ég verð að gera til að fá það sem ég vil fyrir verðið sem ég er tilbúin að borga, sem er ekkert,“ segir Angel í þætti TLC Extreme Cheapskates.
Angel leitar að lyfjum og vítamínum í ruslagámum og þá sérstaklega meðgönguvítamínum. Hún segist rannsaka öll þau lyf sem hún finnur. „Ég hef gert þetta í mjög langan tíma. Ekki prófa þetta heima,“ segir hún.
Í þættinum kemur fram að henni hefur tekist að spara sér 43 þúsund krónur í vítamín- og lyfjakostnað yfir alla meðgönguna.
Angel og eiginmaður hennar, Orlando Toldson, keyptu nýlega hús. Áður átti bræðralag húsið og var ástand þess hræðilegt við kaupin. Aftur á móti var húsið á góðu verði. Angel og Orlando hafa tekið húsið í gegn og fyllt það af húsgögnum og hlutum sem þau fundu í ruslagámum víðsvegar um Texas. Nú vinna þau hörðum höndum að gera barnaherbergið tilbúið. Öll húsgögnin þar inni voru áður rusl einhvers annars.
„Að fá barnarúm úr ruslagámi er eins og að fá einhvern annan hlut þaðan. Ég mun þrífa það og sótthreinsa, passa að það sé öruggt áður en ég leyfi barninu að stíga fæti ofan í það,“ segir Angel.
Hvað segja lesendur, er Angel úrræðagóð eða of nísk?
