Á Instagram er ekki þverfótað fyrir einstaklingum sem telja sig geta gefið öðrum ráð um hvernig þeir eiga að haga sér í ákveðnum aðstæðum. Margir hafa mikið til síns máls en aðrir ekki, eins og gengur.
Olga Shvetsova, 31 árs móðir í Úkraínu, fellur væntanlega í seinni flokkinn en hún hefur notið nokkurra vinsælda á Instagram fyrir að gefa foreldrum ráð við uppeldi barna sinna. Á dögunum náðist ansi sláandi myndband af Olgu sem var tekið á eftirlitsmyndavélar við leiksvæði verslunarmiðstöðvar í borginni Zaporizhia. Mail Online fjallar um þetta.
Á myndbandinu sést þegar Olga beitir sex ára son sinn fólskulegu ofbeldi. Sést hún meðal annars slá son sinn og sparka fast í hann með þeim afleiðingum að hann dettur í gólfið. Það var ekki fyrr en starfsfólk hafði afskipti af Olgu að hún lét af barsmíðunum.
„Hún sagðist hata hann og ýmsilegt fleira í þeim dýr,“ segir sjónarvottur að atvikinu. Natalia, yfirmaður á leiksvæðinu, segir að starfsfólki hafi verið verulega brugðið.
Lögreglan var kölluð á vettvang en Olga var ekki handtekin og eftirmálarnir urðu engir. Það var svo á dögunum að myndbandið rataði á netið að mikil reiðialda braust út. Olga fékk yfir sig holskeflu af skömmum á Instagram-síðu sína, síðu sem hún hefur nú eytt. „Ef hún hagar sér svona á almannafæri, hvað gerir hún heima hjá sér á bak við luktar dyr?“ spurði einn.
Olga svaraði fyrir árásina á Instagram-síðu sinni áður en hún eyddi reikningnum. Þar gekkst hún við því að hafa beitt strákinn ofbeldi en reyndi hvað hún gat að afsaka sig. Hún sagðist hafa verið að glíma við mikla streitu að undanförnu og rekur hún ofbeldið til hennar. Þó viðurkenndi hún að rassskella drenginn og virðist þetta ekki vera í fyrsta sinn sem eitthvað þessu líkt gerist.
„Ef að þú ert manneskja sem aldrei öskrar á barnið þitt, lemur aldrei barnið þitt – þá er ég mjög stolt af þér. Ég er ekki sú manneskja. Ég get öskrað, rassskellt og skammað. Þetta er ég, svona er ég.“ Þá sagði hún að erfitt væri að ala upp tvö ung börn nánast ein síns liðs. Yngri sonur hennar er tveggja ára og er eiginmaður hennar og barnsfaðir oft fjarri vegna vinnu svo vikum skiptir.
„Ég verð oft þreytt. Ég er samt ekki að afsaka þessa hegðun. Það er heimskulegt að ræða þetta. Miklu betra að tala um skó eða nærbuxur en eitthvað svona umdeilt.“ Hún sagði að sonur hennar hefði það gott, stundaði íþróttir, ætti fullt af leikföngum og fengi nóg að borða. Það væri ekki eins og hann væri beittur ofbeldi reglulega.
Þessar útskýringar gerðu ekki mikið fyrir hina ungu móður og voru netverjar fljótir að tæta yfirlýsinguna í sig. „Það versta er að í þessu myndbandi talar hún ekkert um ást sína á barninu.“ Annar segir: „Í eðlilegu landi hefði þessi kona verið fangelsuð og svipt réttindum sínum sem foreldri. Þökk sé úkraínskri löggjöf ganga svona hættulegar skepnur lausar í okkar samfélagi.“
Myndband af atvikinu má sjá hér að neðan en athygli er vakin á því að það kann að vekja óhug hjá fólki:
