Guðni Th. forseti Íslands fagnaði stórafmæli í gær, en hann varð 50 ára. Þrátt fyrir það var dagurinn engu að síður hefðbundinn vinnudagur, en með ýmsum skemmtilegum uppákomum engu að síður.

Guðni hóf daginn með göngu á Helgafell, síðan þegar hann kom heim biðu hans óvæntir gestir, Fjallabræður sem sungu fyrir hann. Guðni kíkti líka í Hljómskálagarðinn og í heimsókn á Landsspítalann, þar sem hann horfði á leik Íslands og Króatíu með krökkunum á Barnaspítala Hringsins.

„Forseta Íslands var boðið í heimsókn á Landspítala í dag í tilefni af fimmtugsafmæli hans. Guðni fékk tertu við hæfi áfangans og horfði síðan æsispenntur með krökkunum á Barnaspítala Hringsins á knattspyrnulandsleik Íslands og Króatíu. Leikurinn var stórkostleg skemmtun og hársbreidd munaði að Ísland kæmist áfram í milliriðla. Frammistaða liðsins undanfarnar vikur á HM hefur verið einstök og þjóðin staðið sem ein manneskja að baki strákanna okkar,“ segir á Facebooksíðu Landsspítalans.

Guðni þakkaði fyrir góðar kveðjur á Facebooksíðu sinni:
„Kæru vinir nær og fjær! Ég þakka allar góðar kveðjur sem hafa borist mér á fimmtugsafmælinu. Dýrmætt er að fagna þessum tímamótum við góða heilsu, með yndislega fjölskyldu og vini nærri. Dagurinn hófst með göngu upp á Helgafell ofan Hafnarfjarðar og svo lá leiðin aftur á Álftanes. Þar biðu óvæntir gestir, Fjallabræður sem hófu upp raust sína með glæsibrag. Og nú er stóri leikurinn framundan! Frá Bessastöðum sendum við Eliza bestu kveðjur til strákanna okkar úti í Rússlandi. Allt getur gerst! Þetta er bara eins og fjallganga: Tindurinn er þarna og leiðin er löng en hún styttist með hverju skrefi. Og ef maður þykist alltaf vita sín takmörk nær maður aldrei að fara skrefinu lengra en síðast. Koma svo, áfram Ísland!“