Ragga Nagli er klínískur heilsusálfræðingur og einkaþjálfari. Á Facebook heldur hún úti vinsælli síðu þar sem hún birtir reglulega pistla um hreyfingu, mataræði og fleira. Í þessum fjallar hún um af hverju við förum á æfingu.
Ekki fara á æfingu til að verða einhvers virði.
Til að troða þér með skóhorni í staðlað útlitsform.
Slefandi á skíðavél til að passa í brók númeri minna.
Farðu á æfingu af því þú ert þess virði.
Til að heiðra líkamann þinn.
Til að fagna því að geta brúkað líkamann þegar þú vilt eins og þú vilt.
Þú getur aldrei stjórnað því hvað aðrir hugsa um þig.
Hvað aðrir segja um þig.
Það verða alltaf þeir sem hafa álit á útliti þínu.
Þeirra neikvæðni segir yfirleitt meira um þeirra innra líf en þitt útlit.
Of vöðvuð. Of grönn. Of feit. Of lítill rass. Of þykk læri.
Í stað þess að eyða okkar örfáu árum á plánetunni Jörð í svefnlausar nætur og útgrátinn kodda yfir hvað einhverjum krepptum tám í úthverfum finnst um rassinn á okkur.
Hvernig væri að eyða þeirri orku frekar í að elska sjálfan þig og heiðra líkamann með að rífa í járn.
Þinn líkami er þitt einkamál.
Hann er þinn bústaður. Öryggið þitt.
Eina manneskjan sem má hafa skoðun á honum ert þú.
Ef þú værir staddur aleinn á eyðieyju og álit annars fólks skyndilega ekki til staðar, myndirðu fara á æfingu til að grennast eða myndirðu fara til að heiðra líkamann þinn?
Við myndum samt alltaf flexa bísepinn því það er valdeflandi skammtur af sjálfstrausti beint í æð.
