Sjöfn Þórðardóttir, verkefnastjóri, ráðgjafi, blaðamaður og formaður Menningarnefndar Seltjarnarness, er einstaklega skipulögð og kemst yfir margt í dagsins önn. Við fengum Sjöfn til að deila með okkur sínum bestu hús- og sparnaðarráðum.

„Besta hús- og sparnaðarráð sem ég hef tileinkað mér gegnum ævina er gott skipulag, hvort sem það er á heimilinu eða í vinnunni, hvort sem það á við uppröðun í skápum, ísskáp, matseld, veisluhöldum, innkaupum, bókhaldi, eða hvað eina sem þarf að huga að á báðum vígstöðvum. Með góðu skipulagi er allt hægt, þú gengur að hlutunum vísum, þú ferð betur með hlutina, þú nýtir tímann betur, kaupir aðeins það sem þig vantar nauðsynlega og umfram allt er það sparnaður,“ segir Sjöfn.

„Til að mynda er ég með ákveðið skipulag hvernig ég raða inn í skápa heimilisins, á matarinnkaupum, tímabókunum og bókhaldi svo dæmi séu tekin. Ég held ávallt dagbók og skrái niður alla dagskrárliði hvort sem það á við vinnu, heimilisverk, viðburði, útréttingar, líkamsrækt eða annað sem til fellur og skipulegg tímann minn vel. Þannig kemst ég yfir meira en ella. Ég er til dæmis í félagsstörfum, sit í stjórnum og nefndum, er sjálfstætt starfandi verkefnastjóri og á fjölskyldu og vini sem ég nýt þess að verja góðum samverustundum með og það tekur tíma að sinna þessu öllu. Það tekst með því að halda gott skipulag og hafa yfirsýn yfir tímabókanir. Það skiptir líka máli að forgangsraða og gera gátlista yfir það sem þú ætlar að gera að hverju sinni.“

Innkaupalisti mikilvægur og að fá tilboð í verk

„Mikilvægt er að gera innkaupalista áður en þú ferð að kaupa inn í matinn, með því er hægt að spara heilmikið og enginn óþarfi keyptur inn. Einnig er mikilvægt að huga vel að öllum kostnaði sem fylgir því að reka heimili eða við annan rekstur og mikilvægt að fá tilboð í öll þau verk sem þarf að sinna. Meðal annars að fá tilboð í tryggingar, ávallt að leitast eftir því að hafa viðskipti við þann sem er með hagkvæmustu tilboðin.

Eitt af mínum áhugamálum er að elda ljúffengan mat og halda veislu og þá er mikilvægt að huga að öllu og er lykilatriði að vera með góðan gátlista þegar góða veislu skal gjöra. Það er líka mikilvægt að huga að heilsunni við matarinnkaupin og matargerðina því slæmir ávanar og matarvenjur auka líkurnar á kostnaði vegna heilsubrests til lengri tíma litið, það er því mikilvægt að vera ekki skammsýnn.“

Velur gæði frekar en magn við fatakaup

„Þegar kemur að fatakaupum er ég mjög vandlát, kaupi einungis það sem mig vantar, ég vel gæðin fram yfir magnið og er iðin við að raða saman flíkum. Ég á það til að kaupa mér nýja flík sem ég veit að passar líka við aðrar flíkur sem ég á. Stíllinn minn er stílhreinn, kvenlegur og fágaður og ég eltist ekki við tískuna hverju sinni heldur það sem klæðir mig vel.“