Stórleikarinn Johnny Depp réðst nú á dögunum á framkvæmdarstjóra á tökustað samkvæmt heimildum frá fréttamiðlinum Page Six. Var þetta á meðan tökum stóð á kvikmyndinni LAbyrinth, þar sem Depp leikur lögreglumanninn Russell Poole sem rannsakar morðið á rapparanum Biggie Smalls.
Talið er að Depp hafi verið undir áhrifum áfengis í miðjum tökum og reynt að kýla starfsmanninn í rifbeinin ásamt því að öskrað að honum: „Ég skal gefa þér hundrað þúsund dali ef þú kýlir mig núna“ áður en leikaranum var vísað frá.
Heimildir Page Six segja að vandræðin hófust þegar Depp heimtaði að leikstýra sjálfur atriði úr myndinni og boðið vinum sínum að leika aukahlutverk. „Vinir hans voru staddir í senunni og þetta varð allt að meiru en átti að vera“, segir ónefnd heimildamanneskja í samtali við miðilinn. Búið var að loka fyrir götu í Los Angeles fyrir myndina en þegar tökuleyfið rann út vildi Depp ólmur halda áfram.
Framleiðendur báðu um frest en á endanum þurfti framkvæmdarstjóri á tökustað að tilkynna leikstjóra myndarinnar, Brad Furman, að lengri tími væri ekki í boði. „Reyndu að segja Johnny Depp það“, átti leikstjórinn að hafa sagt á móti.
Furman hefur gefið út yfirlýsingu og sagt að atvikið hljómi verra en það hafi verið og fullyrti að Johnny Depp væri mikill fagmaður, frábær samstarfskraftur og ávallt stuðningsríkur við aðra á vinnustað, en bætir við að tökur á kvikmyndum geti valdið streitu og það hafi verið kveikiþráðurinn á tilfellinu hér.
