„Mér leið eins og mér hafi verið nauðgað“, segir hótelerfinginn Paris Hilton um kynlífsmyndbandið sem lak á netið árið 2004 og vakti mikla athygli.
Hilton var í viðtali við USA Today þegar hún opnaði sig um myndbandið sem hún tók upp með fyrrverandi kærasta sínum, Rick Salomon, og dreifðist víða undir nafninu 1 Night in Paris.
Paris segist ekki hafa þénað neinn pening frá þessu myndbandi en að Solomon hafi grætt milljónir á því og gerði það illt verra. „Tilfinningin var eins og að tapa hluta af sálinni og það var rætt um þetta á svo grimman máta“, segir hún. „Mig langaði til að deyja. Mér fannst allt vera tekið frá mér og ég vildi ekki lifa þannig“.
Hilton opnar sig meira um kynlífsmyndbandið í heimildarmyndinni The American Meme, sem hún ákvað að taka þátt í til þess að sýna fólki nýja og opnari hlið á sér. Hún bætir við að flestir sjái hana sem „ofdekraða ljósku“ og að hún vilji breyta því.
