Bríet Kristjánsdóttir er íslensk leikkona sem býr og starfar úti í London. Bríet hefur bæði leikið fyrir sjónvarpsþætti og kvikmyndir en nýjasta hlutverk hennar var tekið upp í Los Angeles.
Ég fékk símtal frá leikstjóra þáttanna sem bað mig að koma í prufu, ég var stödd í Kaupmannahöfn á þeim tíma svo allt áheyrnarprufu ferlið fór fram í gegnum upptökur og Skype. Á endanum fékk ég hlutverkið og flaug beint til LA á settið hjá YouTube,
segir Bríet í viðtali við Bleikt.is
Þættirnir sem Bríet er að leika í núna heitir Life as a Mermaid og eru fjölskylduþættir sem fjalla um hafmeyju sem býr á landi. Hafmeyjan gengur í gegnum allskyns áskoranir og berst við fordóma vegna þess að hún er öðruvísi. Íslenska illmennið Astrid (Bríet) reynir að ræna hafmeyjunni til þess að selja hana og græða peninga.
Ég hef líka aðeins tekið að mér skrif og framleiðslu. Ég skrifaði meðal annars, framleiddi og lék í einleik um kvenréttindi og svo framleiddi ég stuttmynd/viðtalsþátt um hlutverk kvenna í Hollywood og hvernig það er að breytast. En kvenréttindi eru augljóslega annað málefni sem ég hef mikla ástríðu fyrir.
Bríet kynntist einum af framleiðanda og leikstjóra þáttanna Life as a Mermaid á frumsýningu sem þær voru saman á.
Okkur kom vel saman og komumst við að því að við áttum margt sameiginlegt, ég pældi nú ekkert í því frekar þangað til mörgum mánuðum seinna þegar ég fékk símtal frá henni.
Bríet er sterk, ævintýragjörn kona sem lætur ekkert stöðva sig í að ná markmiðum sínum. Segist hún vera með sterka réttlætiskennd og ekki hika við að vera rödd fyrir raddlausa. Bríet hefur verið að leika síðan hún man eftir sér.
Við vinkonurnar vorum rosalega skapandi þegar við vorum litlar og alltaf að taka upp sjónvarpsþætti og stuttmyndir. Svo voru það skólaleikritin og öll leikrit sem ég gat komist í þangað til það tók við að fara að gera þetta að atvinnu. Ég held að það sé ekkert annað sem ég gæti verið að gera í lífinu. En því að vera leikkona fylgir líka ábyrgð, að senda rétt skilaboð til þeirra sem fylgjast með manni og að standa fyrir réttu hlutunum. Þar sem ég er með sterkar skoðanir og mikla réttlætiskennd er það mikilvægt fyrir mig líka að halda því sem hluta af vinnunni minni.
Bríet hefur leikið í allskonar kvikmyndum, stuttmyndum, leikritum og þáttum.
Nýverið lék ég í annari seríu af Corrupt Crimes sem verður birt á Netflix og Sky. Aðrir þættir sem ég ef verið að leika í eru It Takes A Killer, Mysteries of the Unexplained, Girl on Girl og fleiri. Einnig lék ég aðalhlutverkið í myndinni Delirium sem var birt á Women in Horror kvikmyndahátíðinni. Aðrar myndir sem ég hef leikið í eru ECO og auðvitað Life as a Mermaid kvikmyndin og fleiri.
Bríet er fædd og uppalin í Vesturbæ Reykjavíkur en hún hefur þó allt sitt líf verið á töluverðu flakki enda mjög ævintýragjörn.
Ég flutti ein til Spánar þegar ég var sautján ára og síðan þá hef ég alltaf verið frekar mikið á flakki. Leiklistin er líka alþjóðlegt tungumál og oft eru ferðalög hluti af vinnunni sem er algjör draumur.
Bríet stefnir hátt í lífinu og hefur fulla trú á því að allt muni ganga vel.
Ég trúi því að allt sé hægt ef nægur vilji er fyrir hendi. Ég stefni mjög hátt og hlakka mikið til framtíðarinnar.
Bríeti líkar vel að búa í London og segir hún borgina mikla listaborg.
Hér er mikil listmenning og spennandi hlutir að gerast þar sem sjónvarpsþættir eru að verða stærri og stærri markaður hér í London. Fólkið hér er skemmtilegt og fjölbreytt og menningin í raun ekkert svo ólík íslenskri sem er ágætt.
Þættirnir Life as a Mermaid eru sýndir á sérstakri Youtube rás og segir Bríet að bransinn sé að breytast mikið eftir að samfélagsmiðlarnir komu.
Þetta er orðið mjög algengt. Allur bransinn er að breytast rosalega mikið eftir að Youtube og Musical.ly og fleiri platformar urðu svona stórir. Sérstaklega þegar kemur að ungu fólki eins og aðal áhorfendahóp þáttanna, þau eru orðin svo rosalega virk á netinu. Núna eru margar af stærstu stjörnunum í Hollywood svokallaðar „Youtube stjörnur eða Instragram stjörnur“. Það er mjög áhugavert að fylgjast með þessari þróun og spennandi að sjá hvert þetta leiðir. Ég er mjög þakklát fyrir að fá að vera partur af þessu öllu.
Bríet er mikill dýravinur og segir hún það mikla ástríðu í lífi sínu að hjálpa þeim dýrum sem minna mega sín eða er farið illa með.
Það eru líka skilaboð sem ég reyni að miðla til þeirra sem fylgjast með mér. Ég vinn oft sjálfboðavinnu með dýrum og reyni að heimsækja eins mörg dýraathvort of ég get á þeim stöðum sem ég heimsæki. Þannig reyni ég á jákvæðan hátt að draga athygli að því hvað það er gott og gefandi að hjálpa dýrum.
Hægt er að fylgjast með henni Bríet á Instagram: briekristiansen
Einnig er hún skráð á IMDB fyrir áhugasama: Briekristiansen
Brie Kristiansen er sem sagt nafnið sem ég geng undir erlendis, en það er alveg ómögulegt að kenna fólki að bera fram Bríet Kristjánsdóttir,
segir þessi duglega og jákvæða kona að lokum.
