Sara Lind Annþórsdóttir vaknaði dag einn og brotnaði niður eftir mörg áföll. Hún ákvað að leita sér hjálpar því hún var hrædd við það sem hún þekkti ekki og fannst hún ekki geta stólað á sjálfa sig.
Ég tók ákvörðun um að henda mér út í djúpu laugina og flytja til Tenerife. Tveimur mánuðum síðar var ég komin út, með enga íbúð, enga vinnu og vissi ekkert hvað ég ætlaði að gera. En ég ætlaði að redda öllu þannig að ég gæti búið þarna í sex mánuði og farið svo aftur heim til Íslands,
segir Sara í einlægri færslu á Facebook en hún gaf Bleikt.is góðfúslegt leyfi til þess að greina frá henni.
Eftir mikið vesen flutti Sara inn í íbúð á draumastaðnum sínum á Tenerife og hóf nýtt líf.
Ég byrjaði með mitt eigið „fyrirtæki“ og er núna að passa börn fyrir Íslendinga sem koma í frí til Tenerife. Ég fór á fullt í sjálfsvinnu bæði andlega og líkamlega og talaði um það sem hafði legið mér lengi á hjarta. Ég fékk hjálp úr öllum áttum með andlega þáttinn og fékk svo hjálp frá besta þjálfara í heimi til þess að koma líkamanum og lífsstílnum á réttan stað.
Fljótlega fór lífið að bjóða henni upp á óvænta hluti og sótti hún um að fá að passa börn á Miami.
Ég var svo komin til Miami tveimur vikum seinna og átti að vera þar í þrjá mánuði sem urðu svo að sex mánuðum. Þessi börn og þetta líf hefur kennt mér svo margt og nú er ég búin að sjá hvað heimurinn er stór, fallegur og hættulegur á sama tíma.
Nú er liðið ár síðan Sara ákvað að flytja út til Tenerife og er hún virkilega stolt af sjálfri sér.
Lífið hefur upp á allt að bjóða sem þú óskar þér, þú þarft bara að fara eftir því.
Í samtali við Bleikt.is segist Sara ekki vera á leið til Íslands strax en hún er staðsett á Miami um þessar mundir og fer aftur til Tenerife í apríl en þar mun hún sjá um að passa börn fyrir Íslendinga næsta sumar.
Hægt er að fylgjast með Söru á Snapchat undir notandanafninu: saralind94
