Flestar konur og pör, kannast við spurninguna „hvenær kemur barnið?“. Flestum finnst spurningin óþægileg og þykir svarið hreinlega ekki koma fólki við.
Hólmfríður Brynja Heimisdóttir kannast vel við þessa spurningu en hún fór að heyra hana fyrst stuttu eftir nítján ára afmæli sitt.
Það var um það bil viku eftir að ég fór í mína fyrstu og einu fóstureyðingu en á þeim tíma var ég ekki tilbúin fyrir barneignir. Sama hvort fólk sé sammála því eða ekki þá var þetta mín ákvörðun,
segir Hólmfríður í einlægri færslu sinni á Narnía.
Hólmfríður var stödd í fjölskylduboði þegar hún var spurð spurningarinnar í fyrsta skiptið.
Ég vissi ekkert hverju ég ætti að svara og sagði því fátt. Mér fannst þetta hreinlega ekki koma neinum við þrátt fyrir að þau meintu alls ekkert slæmt með spurningunni.
Hólmfríður er í dag að verða 24 ára gömul og hefur ekki enn eignast barn.
Eftir að ég og sambýlismaður minn ákváðum að við værum tilbúin til þess aðeignast börn þá hættum við að nota getnaðarvarnir. Það gerðist ekkert í marga mánuði og var tíðahringurinn minn vægast sagt furðulegur. Hann fór frá því að vera 60 dagar og allt upp í 80 daga, ég fór því oft til læknis en þeir fundu aldrei neitt að.
Læknarnir greindu Hólmfríði frá því að tíðahringurinn myndi jafna sig með tímanum.
Í byrjun árs 2016 fór ég svo suður á Domus Medica og hitti þar Karl Ólafsson sem loksins greindi mig með PCOS. Það tók hann ekki nema einn tíma til þess að átta sig á því hvað væri í gangi og var ég strax sett á lyf til þess að halda einkennum niðri. Mín einkenni voru meðal annars óreglulegar blæðingar vegna fækkunar á egglosi, hárlos, blöðrur á eggjastokkum og ofþyngd.
Hólmfríði var sagt að gefa lyfjunum eitt ár og ef að hún yrði ekki þunguð á þeim tíma ætti hún að mæta aftur til læknisins til þess að ákveða næsta skref.
Ég og sambýlismaður minn ákváðum þá að byrja á því að ferðast um heiminn og njóta lífsins en næsta skref hjá okkur er að fara í ferli hjá IVF klíníkinni. Við höfum ekki lagt í það strax þar sem það er mjög tímafrekt og krefst margra ferða suður ásamt því að vera mjög kostnaðarsamt ferli.
Hólmfríður og sambýlismaður hennar vissu að þau þyrftu að plana ferlið vel og ákváðu því að njóta lífsins fyrst og ferðast eins mikið og þau gætu.
Og það höfum við sko aldeilis gert, bæði saman og í sitthvoru lagi. Síðan ég greindist hef ég farið til Orlandi, Alicante, tvisvar sinnum til Amsterdam, þrisvar sinnum til Tenerife, Þýskalands á Októberfest og að lokum til Belgíu á Tomorrowland. Við erum einmitt núna að skipuleggja næstu ferð til Belgíu sem við förum í næsta sumar.
Hólmfríður fær enn reglulega spurninguna af og til en í dag hefur hún lært að svara fyrir sig.
Nú þegar ég fæ hana segi ég til dæmis: „Ég veit það ekki, bráðum, það fer að koma að því eða þá að ég svara þeim bara hreint út og segi þeim hver staðan er“ og þá er ég yfirleitt ekki spurð aftur af þeirri manneskju.
Hólmfríður hvetur fólk til þess að vanda sig vel og passa sig á því hvað það segir við fólk á barneignaraldri þar sem erfitt er að vita hvort fólk á einfaldlega í erfiðleikum með að eignast barn og geti spurningin því lagst misvel í fólk.
Hægt er að fylgjast með Hólmfríði á Snapchat og Instagram undir notandanafninu: brynjaheimis
