Ester Boateng var aðeins sautján ára gömul þegar hún tók við móðurhlutverki tveggja ungra drengja sem ekki voru í neinu sambandi við blóðmóður sína. Ester segir hlutverkið hafa verið krefjandi en ótrúlega gefandi og skemmtilegt.
Að vera sautján ára gömul að hugsa um heimili og börn var oft mjög erfitt. Ég missti auðvitað af ýmsu sem vinir mínir voru að gera, eins og að fara til útlanda og að skemmta sér. Mér þótti oft erfitt að segjast ekki geta komið með því ég þyrfti að vera heima með tvö börn en ég valdi þetta samt sjálf og ég sé ekki eftir því. Ég eignaðist tvo stráka sem munu alltaf vera í lífi mínu og ég elska þá gríðarlega mikið,
segir Ester í viðtali við Bleikt.is
Ester kynntist föður drengjanna þegar hún var sautján ára gömul og hófu þau sambúð mjög fljótt.
Blóðmóðir strákana var ekki inn í myndinni og gekk ég því inn í móðurhlutverkið en ég er samt ekki skráð móðir þeirra. Við pabbi þeirra vorum saman í sex ár og það var mjög erfitt þegar leiðir okkar skildu. Það voru þung skref að taka og mér fannst erfitt að geta ekki tekið strákana með mér. Mér leið hreinlega eins og ég væri að yfirgefa þá.
Ester reyndi þó að halda góðu sambandi við strákana og bauð þeim heim til sín á sumrin í sumarfríinu þeirra.
Stundum gekk það upp, stundum ekki en samband okkar strákana er þó mjög gott í dag þrátt fyrir að þeir séu nú orðnir sautján og nítján ára gamlir. Þeir verða alltaf strákarnir mínir og ég mun alltaf vera móðir þeirra.
Strákarnir voru einungis eins árs og þriggja ára þegar Ester kom inn í líf þeirra og tóku þeir hana mjög fljótt í sátt sem móðir.
Sá yngri var bara rétt rúmlega eins árs og tók hann mér alveg strax sem mömmu en sá eldri sem var um þriggja ára þá tók örlítið lengri tíma til þess að skoða málið. Ég var mjög heppin að foreldrar mínir og amma og afi voru alltaf til staðar og studdu þau mig mikið. Það gerði þetta móðurhlutverk mikið auðveldara fyrir sautján ára stúlku.
Ester býr í dag fyrir austan með fjölskyldu sinni en hún á unnusta frá Ghana sem hefur búið á Íslandi í mörg ár. Með honum á hún í dag tvo drengi.
Við kynntumst í Reykjavík í gegnum sameiginlega vini, höfum verið saman í átta ár og stefnum á að gifta okkur í sumar.
Ester er greind með ofsakvíða og á það til að velta því allt of mikið fyrir sér hvað öðrum finnst um hana.
En ég nenni því ekki lengur mig langar að vera ég sjálf óháð því hvað öðrum finnst og ákvað ég því að opna snappið mitt. Líka til þess að hvetja sjálfa mig til þess að standa mig betur í því að mæta samviskusamlega í ræktina og passa upp á mataræðið. Það er svo oft þannig að þegar maður segir eða sýnir öðrum að maður ætli að standa sig að þá er ekki hægt að svindla.
Ester lýsir snappinu sínu sem engu glansmyndarsnappi og langar henni til þess að sýna fólki hvernig hún ætlar að koma sér úr yfirþyngd og í það form sem henni dreymir um.
Hægt er að fylgjast með Ester á snappinu: ezzagotit
