„Það er mikilvægt að segja frá þessu í forvarnarskyni og brýna á þessu í samfélaginu okkar í dag. Það er bara orðið þannig að það virðast allir vera með augun á símanum þegar verið er að keyra,“ segir Birgitta Snorradóttir í samtali við Bleikt. Í gær var Birgitta stödd á Langholtsvegi með sjö ára gömlum syni sínum sem er nýbúin að læra að hjóla.

Vinnumaður á staðnum bjargaði líklega lífi hans

„Við biðum samviskusamlega við umferðarljósin sem eru gegnt Beco þegar sonur minn segir mér að það sé komin grænn kall. Ég sé að það er rétt og geng af stað á undan honum yfir gangstéttina. Ég veit svo ekki fyrr en ég heyri öskur á bakvið mig og sé þá að þar er kominn vegavinnumaður sem hlaupið hefur fyrir bíl sem fór yfir á rauðu ljósi. Hún var aðeins um meter eða minna frá því að keyra son minn niður.“

Birgitta telur líklegt að konan hafi verið á milli tvítugs og þrítugs.

„Hún var svo upptekin af því að vera í símanum að hún mátti ekki einu sinni vera að því að stoppa og kanna líðanina hjá barninu eða hvort allt væri í lagi.“

Kennum börnunum umferðarreglur sem fullorðið fólk fer ekki eftir

Birgitta telur mikilvægt að brýna fyrir fólki að farsímanotkun við keyrslu sé ekki í lagi.

„Það er nákvæmlega ekki neitt sem skiptir meira máli eða er mikilvægara en að fylgjast með umferðinni og umhverfi sínu við akstur. Fylgist með, sýnið aðgát og ekki gleyma að hafa það hugfast að það er nóg að líta undan eitt augnablik og þú gætir tekið líf. Eins og hefði geta gerst í gær ef ekki hefði verið fyrir þennan mann sem bjargaði syni mínum.“

Sonur Birgittu er við góða heilsu í dag og telur hún líklegt að hann sjálfur hafi ekki áttað sig almennilega á aðstæðum sínum í gær.

„Auðvitað var honum aðeins brugðið en að sem sat mest eftir og við ræddum mikið þegar við héldum ferð okkar áfram, var það að hann var svo hissa á því að bíll keyrði yfir á grænum kalli. Við erum að kenna börnunum umferðarreglur og svo sjá þau að þeim er ekki fylgt eftir af fullorðna fólkinu.“