Mæðrastyrksnefnd hóf nýverið sölu á Mæðrastyrkspokanum svonefnda, en hann má kaupa með því að styrkja samtökin með upphæð sem nemur einum fullum poka af matvælum.
„Þannig hjálpumst við að og léttum undir með fólki sem hefur lítið á milli handanna, poka fyrir poka,“ segir á vef Mæðrastyrksnefndar.
Samtökin voru stofnuð árið 1928 og hafa stutt við bakið á þeim efnaminni síðan þá, sem og því að hafa barist fyrir mannúðlegri félagsmálalöggjöf. Að jafnaði aðstoðar nefndin um 300 heimili á viku og miklu fleiri í kringum stórhátíðir.
Mæðrastyrkspokinn er skreyttur mynd eftir listakonuna Hörpu Einarsdóttur. Á teiknuðu myndinni sést kona sem ver sig og ungann sinn fyrir utanaðkomandi ógn.
Á vefnum segir að umrædd mynd tákni styrkinn og staðfestuna sem þarf að sýna til að halda velli í lífsins ólgusjó, auk þess sem hún sýnir að öll getum við þurft á verndandi öflum að halda til að bæta líf okkar.
