Frá því að Katrín Njarðvík var lítil stúlka þótti henni alltaf gaman að fylgjast með fegurðarsamkeppnum og dreymdi hana um að taka þátt í einni þegar hún yrði eldri.
En þegar ég var yngri voru reglur þess efnis að konur þyrftu að vera ákveðið háar til þess að fá inngöngu í keppnina. Þar sem ég er aðeins 155 sentimetrar á hæð var ég alltaf langt undir meðalhæð og hélt ég fengi aldrei tækifæri til þess að taka þátt. Þegar ég var hins vegar orðin 18 ára þá féllu þessar reglur úr gildi og þið getið rétt ímyndað ykkur hversu glöð ég var,
segir Katrín í einlægri færslu sinni á Glam.is þar sem hún fjallar um þátttöku sína í keppninni ungfrú Ísland og Miss Universe Iceland.
Árið 2015 sendi ég inn umsókn og fékk boð í viðtal, ég var hins vegar í Frakklandi þegar viðtölin áttu að fara fram en ég fékk að senda inn myndband af sjálfri mér þar sem ég kynnti mig og sagði þeim frá mér. Nokkrum dögum síðar fékk ég tölvupóst þess efnis að ég væri ein af þeim sem þau völdu og ég var svo glöð að ég öskraði og hoppaði um.
Katrín segir að henni finnist ótrúlegt hversu óundirbúin hún hafi verið loksins þegar hún tók þátt þar sem hún hafði fylgst með úf fjarlægð svo lengi.
Ég hafði ekki hugmynd um hvað ég var að fara út í, sumar stelpurnar voru alltaf svo fínar en ég var alltaf bara í gallabuxum og bol, með ógreitt hárið.
Segir Katrín og hlær.
Eftir þátttöku Katrínar í ungfrú Ísland árið 2015 sótti hún um þátttöku í Miss Universe Iceland sem hún fékk einnig að taka þátt í árið eftir.
Það sem stóð upp úr ungfrú Ísland keppninni var allt það skemmtilega sem við gerðum saman. Við fórum á gönguæfingar sem var alltaf fjör ár, en þær hjálpuðu manni verulega að byggja upp sjálfstraustið. Svo fórum við á allskonar skemmtilega viðburði, skiptum okkur upp í hópa og styrktum góðgerðarmál og fleira.
Katrín segir að það sem hafi komið henni hvað mest á óvart var hversu mikið af niðrandi hlutum voru sagðir um keppendurna á netinu.
Og þá sérstaklega á Twitter. Aldrei myndi ég persónulega tala illa um aðra manneskju þrátt fyrir að ég sé kannski ekki sammála því sem hún er að gera, en svona erum við misjöfn.
Katrín greinir frá því að þegar hún tók þátt í ungfrú Ísland hafi keppendunum aldrei verði skipað að fara í ræktina, né að gera einhverja aðra hluti sem þær vildu ekki gera.
Það var aldrei sagt við okkur að við yrðum að fara í ræktina, borða hollt eða vera með brúnkukrem. Við máttum ráða því algjörlega sjálfar, enda fór ég sjálf ekki mikið í ræktina fyrir þessa keppni.
Katrín segir að mikill munur sé á milli keppnanna tveggja sem hún tók þátt í og að Miss Universe Iceland hafi heillað hana meira.
Þar þurfum við að læra dansrútínu sem við dönsuðum svo á sviðinu og það var skemmtileg tilbreyting. Í MUI þarf líka að undirbúa sig fyrir spurningar sem eru lagðar fyrir mann á ensku ef maður kemst í topp tíu. Ég hef alltaf talið mig vera mjög góða í ensku en því miður út af stressi þá mundi ég mjög fá orð og stóð uppi á sviði fyrir framan alla og kom ekki einu orði út úr mér í góða stund, það var alls ekki uppáhalds augnablikið mitt í keppninni.
Katrín segir að reynsla hennar af báðum keppnunum sé virkilega góð.
Ég get auðvitað bara talað fyrir sjálfa mig en ég átti frábæra reynslu, þetta var ótrúlega skemmtilegt og hjálpaði mér mikið með sjálfstraustið. Ég er enn þá að vona að einn daginn fái mæður líka tækifæri á að vera með hér í keppnum á Íslandi. Að mínu mati er ekki mikilvægast að vinna í svona keppni heldur tækifærið til þess að öðlast nýja lífsreynslu. Mér finnst þessar keppnir ekki lengur snúast um það hver er í besta forminu heldur fjölbreytileika, sem mér finnst frábært.
Hægt er að fylgjast með Katrínu á Instagram: katrinnjardvik
