Aníta Arndal á tvær ungar dætur sem henni þykir gaman að monta sig af. Oftar en ekki verður fólk hissa á því að svona ung stúlka eigi tvö börn en það sem Anítu þykir þó virkilega sorglegt er að iðulega spyr fólk hana að því hvort hún eigi þær báðar með sama manninum með undrandi svip.
Eldri dóttir mín verður 4 ára í ágúst og sú yngri 2 ára í mars. Fólk er hissa yfir því að ég eigi tvö börn svona ung og fer svo í sjokk þegar ég segist eiga þær báðar með sama manninum og fara þá að hrósa mér fyrir það,
segir Aníta í einlægum pistli sínum á bloggsíðu sinni.
Vel gert hvað? Hvað kemur það ykkur við hvort ég eigi börnin mín með sama manninum? Væru börnin mín eitthvað verri ef þau ættu ekki sama pabbann? Væru þau ekki jafn mikilvæg eða jafn sæt? Eða væri ég eitthvað verri?
Aníta tekur fram að konur sem eiga börn með fleiri en einum manni séu ekki verri en aðrar konur.
En það er þannig sem ég les það þegar fólk spyr mig að þessari spurningu. Hvað ef ég hefði sagt nei, að þær ættu reyndar ekki sama pabbann. Væri það ekki eins mikið sjokk fyrir fólk. Eða hvaða svari er fólk að leitast eftir? Af hverju spyr það þessarar spurningar?
Aníta segir að í kjölfarið fái hún oft spurninguna hvort þau séu enn saman.
Eflaust eru þetta bara forvitni en mér þykir þetta á svo gráu svæði og ég veit það eru aðrar mæður sem eru sammála mér. Mér finnst mikilvægt að fólk vandi sig í samræðum og hugsi áður en það tali.
Hægt er að fylgjast með Anítu á eftirfarandi miðlum:
Snapchat: trendneglur
Instagram: anitaarndal og nailsbyarndal
