Eva Ruza ætti að vera flestum íslendingum kunn en hún lifir og hrærist í samfélagsmiðlabransa landsins. Eva hefur margoft verið kynnir á hinum ýmsu viðburðum og er nú á fullu í undirbúningi fyrir Miss Universe Iceland þar sem hún mun valsa um sviðið sem kynnir og stefnir hún á að reyta af sér brandarana. Áhugamál Evu eru fyrst og fremst fjölskyldan en það sem henni þykir lang skemmtilegast að gera er að standa á sviði og láta gamminn geysa ásamt því að fylgjast með öllu því sem gerist í Hollywood.

Eva er einnig bloggari á síðunni Króm.is og heldur úti opnu Snapchati. Hún er gift tvíburamamma sem starfar með móður sinni í Ísblóm, blómabúð sem er í eigu þeirra mæðra. Það má því segja að hún hafi í nægu að snúast en við hjá Bleikt fengum Evu til þess að svara fyrir okkur nokkrum laufléttum spurningum:

Persónuleiki þinn í fimm orðum?

Hahaha, Skellibjalla ætti eiginlega að vera orðið í fyrsta öðru og þriðja sæti.

Brussa…sumir vilja meina (allir) að ég sé brussa. Mjög spes og ákveðinn skellur á tignarlegu 180 cm gyðjuna sem ég er.

Góð og ógeðslega væmin. Svo væmin að hann Siggi minn getur alveg ranghvolft augunum framan í mig þegar ég tjái honum ást mína.

Glaðværð er stór partur af persónuleika mínum og ég á erfitt með að þykjast vera eitthvað annað en ég er. What you see is what you get. Það þarf mikið til að stuða mig, og í raun eru einu skiptin sem einhver sér mig pirraða eða brjálaða þegar ég er svöng. Þá er ég alveg snar. Annars bara ferleg dúlla.

Hver er þinn helsti veikleiki?

Gleymska. Er svo agalega gleymin að það er hálfvandræðalegt. En málið er að ég gleymi bara litlu hlutunum sem ég á að muna. Ég bæti upp gleymskuna með hrikalega krúttlegu brosi og hvolpaaugum. Ég man t.d. ekkert sem mamma biður mig um að muna. Ég kenni uppeldinu um. Held að þessi galli sé alfarið mömmu og pabba að kenna. Er ekki búin að hugsa á hvaða  hátt ég get kennt þeim um samt.

Áttu þér mottó í lífinu?

Já veistu, mér finnst bara lang best að smæla framan í heiminn. Það hefur reynst mér best. Það er langbest að troða bara sól í hjarta og vaða svo um bæinn með smælið límt á fésið. Ég lofa, þið verðið gangandi sólargeislar sem allir taka eftir. Er þetta ekki annars mottó? 😉

Stíllinn þinn í fimm orðum?

Vá er svo fegin að þessi spurning kom, því ég er geðveikt mikil fassjón görl.

Ég mundi segja að stíllinn minn sé kósí, litaglaður, smá rómó, þægilegur – fellur það orð kannski undir kósí? og glitrandi…ég eeeeeeelska allt sem glitrar.

Hvað er best við haustið?

Haustið er vanalega tími sem mér finnst alltaf notalegur. Þá verð ég ennþá meira væmin en vanalega og kveiki á kertum útum allt, elska að standa í eldhúsinu og elda góðan kvöldmat, (sem ég nenni ekki að gera á sumrin því þá er ég svo bissí að hanga úti í sólbaði eins lengi og sólin hangir uppi. ) Og fara í kósí stóru mjúku peysurnar mínar. Haustin eru kósí. Reyndar finnst mér allar árstíðirnar hafa sinn sjarma, en ég er sumartýpan og vildi óska að það væri bara alltaf sumar.

Hvern dreymir þig um að hitta?

Halló Bruno Mars…. ég hitti hann reyndar í apríl a tónleikunum hans í London. Eða þú fattar, sá hann…. Er ekki viss um að hann viti af tilvist minni á þessari jörð en kannski einn daginn mun ég standa fyrir framan hann, líta niður og horfa beint í augun hans. Hann er náttúrulega svo smávaxinn þessi elska.. Og ég eins og gíraffi.

Og Ellen DeGeneres. Bruno og Ellen væru geggjað kombó í kósí dinner. Bruno gæti sungið fyrir okkur Ellen um Versace kjólinn og við Ellen sagt brandara til skiptis.

Uppáhaldsbók?

Me before you. Halló horgrenj. Ferlega vel skrifuð bók sem skilur mann eftir með grátbólgin augu, kökk og ekka. Elska svoleiðis bækur. Væmna týpan í mér sjáiði til 🙂

Hver er þín fyrirmynd?

Ég hef svarað þessari spurningu áður og svara henni alltaf eins. Mamma og pabbi eru  mínar fyrirmyndir. Það er enginn betri en þau. Og svo er það hún elsku Ellen DeGeneres sem ég hef dáðst af síðan hún kom fyrst fram á sjónarsviðið.

Ef þú ættir þrjár milljónir til að eyða í eitthvað – hvað yrði það?

Pakka nokkrum nauðsynjum í tösku, kaupa miða fyrir alla fjölskylduna á eitthvað sjúkt hótel í Karíbahafinu og þar myndum við vera og ferðast þangað til allir peningarnir væru bara búnir.

Twitter eða Facebook?

Facebook allan daginn….reyndar hef ég gaman af twitter umræðum um hin merka sjónvarpsþátt um Piparsveina og meyjar í USA.( Bachelor/ette) Finnst ferlega gaman að renna yfir tvítin sem fylgja eftir hvern þátt sem fer í loftið þarna úti.

Hvaða hlutar gætir þú ekki verið án?

Giftingarhringurinn minn er sá hlutur á mér sem ég tek aldrei af mér og mun aldrei taka af…. Og svo verð ég að svara hreinskilningslega og segja síminn. Síminn er litla fyrirtækið mitt sem heldur flestu af því sem ég vasast í gangandi.

Hvað óttastu mest?

Að missa einhvern sem ég elska.

Hvaða tónlist er á spilunarlistanum?

Ég er mesti píkupoppari sem Ísland hefur alið. Ég held heiðri hina ýmsu strákabanda, eins og Backstreet Boys og 5ive á lofti, ásamt því að blasta Bruno Mars , sem er mitt uppáhald, við öll tækifæri. Jennifer Lopes, Ricky Martin, Ed Sheeran, Charlie Puth og hinni ýmsu latino tónlist. Og mér finnst gaman að segja frá því að ég var sú fyrsta á Íslandi sem byrjaði að spila Despacito (ég sverða..eða ok held því fram allavega). Ég heyrði það fyrst daginn eftir að það var gefið út og blastaði það í botni þangað til útvarpsstöðvar landsins tóku við sér og áttuðu sig á þessum hittara.

Áttu þér eitthvað „guilty pleasure”?

Ég eeeeeelska sterka brjóstsykra. OG súkkulaði…og ís…og. Ok næsta spurning. Gæti haldið áfram.

Ef þú værir dýr, hvaða dýr myndir þú vilja vera og af hverju?

Sko ég mundi gjarnan vilja vera litríkur fugl í einhverjum fallegum regnskógi. Gæti bara flogið þangað sem ég vildi. Er með myndina Rio í huga núna. Vil bara vera fugl ef ég má vera fugl í þeirri bíómynd. Annars er mér oft líkt við strút. Pabba finnst það fyndinn djókur.

Hvar er hægt að fylgjast með þér?

Ég er mjög virk á hinum ýmsu samfélgasmiðlum og legg mikinn metnað í það sem ég geri þar og þá helst skemmtanagildið.

Snappið mitt er : evaruza og ég lít á það sem litla sjónvarpsstöð og það eina sem ég vil er að fólk hlæji þegar það horfir. Reyndar hef ég verið að henda í viðbjóðsleg hryllingsstory undanfarið þar sem ég er aðeins að vasast í kringum Halloween Horror Show tónleikana 28. Október. Þau story hafa hrætt fólk illilega en ég hinsvegar skemmt mér konunglega.

Systir mín hún Tinna, er sérleg aðstoðarkona mín á snappinu þegar ég vil hafa þetta almennilegt, og sá hún t.d um förðunina á skrímslinu. Því hún Tinna mín er ein sú besta í svona skrímslaförðun  á landinu. No joke. Hugmyndarflug hennar er endalaust . Ég hef mikinn metnað á snappinu og lít á það sem litla skemmtirás með hressasta fólki landsins sem áhorfendur.

Instagram: evaruza – Ég held að þegar fólk rennir yfir instagrammið mitt sér það persónuleikann minn skýna í gegn sem ég er ánægð með og er nákvæmlega eins og ég vil hafa það.

Einnig er ég með ansi hressilega facebook like síðu : www.facebook.com/evaruzam þar sem ég birti efni sem ég er að ,,framleiða“ á snappinu og pósta þar inn einungist skemmtiefni fyrir fólk. Ég á orðið geggjað safn af myndböndum sem ég hef gert bæði á snappinu mínu og ekki á snappinu.

Hvað er framundan hjá þér í vetur?

Það er alltaf mikið um að vera. Alltaf þegar ég held að það sé að róast hjá mér, þá dettur eitthvað upp í hendurnar á mér, sem ég elska. En framundan hjá mér er undirbúningur fyrir Miss Universe Iceland keppnina, en kynnirinn í þeirri keppni gegnir stóru hlutverki líkt og úti í Bandaríkjunum þannig að ég er bara á fullu að græja mig og undirbúa fyrir það. Svo í október ætla ég að henda mér í skrímslabúning og vasast í kringum Halloween Horror Show tónleikana. Guð má svo vita hvað bíður mín næst, en það verður pottþétt eitthvað geggjað!

Eitthvað annað sem þú vilt að komi fram?

Verið bara glöð kids og hlæjið eitthvað smá á hverjum degi. Eina sem blívar og eina vitið í þessu lífi!