„Síðasta haust stóðum við hjónin frammi fyrir því að reyna að finna fleiri tekjumöguleika fyrir sauðféð, eða hætta að vera með kindurnar,“ segir Hulda Brynjólfsdóttir, en hún er konan sem er að gera íslenska prjónara, já og reyndar prjónara víða um heim, mjög spennta um þessar mundir.

Hulda er kennari og bóndi, fædd og uppalin í sveit og hefur alltaf haft hesta, hunda og kindur í kringum sig. Hulda býr núna í Rangárvallasýslu.

„Þegar ég flutti í hingað var ég fyrst um sinn án hesta og kinda, en hafði hund með mér og þá kom mér á óvart að það voru kindurnar sem ég saknaði mest. Þannig að þegar ég flutti á sveitabæ, var fljótlega farið í það að fjölga fénu sem þar var og nú get ég líka titlað mig sem sauðfjárbónda.“

Hulda hefur alltaf haft áhuga á því sem var gert í gamla daga og hvernig þjóðin lifði af erfiðar aðstæður. „Þar kom sauðkindin sterk inn. Útvegaði mat og fatnað á alla íbúa landsins. Hélt hita á þjóðinni ef svo má segja.“

Ástæðan fyrir spenningnum meðal prjónaranna er sú að Hulda er að reyna að koma á laggirnar spunaverkstæði fyrir íslensku ullina.

Hulda hefur spunnð sjálf á rokk og snældu í rúm 4 ár síðan hún komst í félagsskap kvenna sem kunna að spinna. „Ég hef sótt námskeið með þeim í listspuna og jurtalitun og kann orðið aðeins til verka í ýmsum þáttum tóvinnu, þó ég sé kannski enginn sérfræðingur.“
Áhuginn óx og hún ákvað að reyna að stofna stærra spunaverkstæði með vélum frá Kanada. Um er að ræða litla verksmiðju sem verður miklu, miklu minni en spunaverksmiðja Ístex sem er sú eina á landinu í dag. Ístex er fyrirtækið sem framleiðir lopann sem við þekkjum svo vel og elskum svo heitt.

„Við ætlum að flytja vélar frá Kanada til landsins og hefja vinnslu á ullinni okkar og ull annarra bænda til að búa til garn eða hráefni sem handverksfólk getur nýtt til að vinna úr. En íslenska ullin er magnað hráefni sem hægt er að nýta til ótalmargra hluta.“

Vélarnar eru væntanlegar til landsins í júní.

„Þá munum við byrja að æfa okkur að nota þær og hanna þær vörur sem verða í boði fyrir viðskiptavini. En við munum einnig bjóða öðrum ullareigendum að koma til okkar með ullina sína og fá hana unna að eigin óskum. Við munum fyrst og fremst vera með 100% hreina íslenska ull í ekta sauðalitum. Ekki verður um litaða sauðaliti að ræða, heldur ekta.“

Við á Bleikt segjum HÚRRA FYRIR SAUÐKINDINNI og hvetjum lesendur til að leggja verkefninu lið í gegnum Indiegogo.