Óvænt atvik átti sér stað á tónleikum Adele í Ástralíu um helgina. Söngkonan bauð Wade Nicholson-Doyle og kærasta hans, Chris, upp á svið í Etihad-leikvanginum í Melbourne fyrir framan rúmlega 77 þúsund aðdáendur. Eftir að þeir höfðu heilsað Adele kom augnablikið sem enginn hafði reiknað með – nema Wade.
Hann kraup niður á hnéskeljarnar og bað Chris að giftast sér við ótrúleg fagnaðarlæti úr salnum. „Ég hafði ekki hugmynd um að þetta myndi gerast. Þetta var ekki skipulagt,“ sagði Adele þegar þessu óvænta bónorði var lokið. Hér má sjá myndband af þessu fallega augnabliki sem kom öllum rækilega á óvart.
https://www.youtube.com/watch?v=p39pbU-ykd8
Í viðtali við BBC segir Wade að þar sem hjónabönd samkynhneigðra séu ekki leyfð í Ástralíu ætli þeir að heitbindast hver öðrum í faðmi fjölskyldu og vina. Hann segist hafa verið í algjöru losti á sviðinu með Adele og sínum heittelskaða Chris.
„Að deila sviði með henni, þó ekki væri nema í fimm mínútur, er alveg hreint ótrúlegt. Við stöndum í þakkarskuld við hana,“ segir Wade.
