Lengi hefur verið talað um það að skortur sé á kvenkynspersónum í skemmtiefni fyrir börn. Fyrir nokkrum árum hefði það tekið dágóða stund að finna kvenkynsleikfang úr stórmynd sumarsins hverju sinni en það hefur breyst mikið á undanförnum árum. Hver er skýringin?
Star Wars bálkurinn var endurvakinn fyrir nokkru þegar Disney samsteypan keypti réttinn af myndunum af George Lucas. Fyrsta Star Wars myndin frá Disney var Force Awakens sem frumsýnd var um jólin 2015. Þar er í aðalhlutverki Rey, leikin af Daisey Ridley. Þetta mældist misvel fyrir í ýmsum hornum internetsins en óhætt er að segja að tekist hafi vel til.
Disney tók áhættu og hafði kvenhetju í Force Awakens. Hún seldist betur en flestir, fyrir utan Kylo Ren, en vondi kallinn selst alltaf best,
segir Jim Silver, forstjóri TTPM vefsíðu sem veitir umsagnir um leikföng.
Lítið hefur farið fyrir sterkum kvenhetjum í stórmyndum frá Hollywood og því greinilegt að Disney hitti á vannýttan markað með Rey en áður fyrr veigruðu fyrirtæki sér við að framleiða slíkan varning vegna þess að þau töldu að hann seldist ekki. Fyrirtækið hefur nú selt Star Wars varning fyrir næstum því hálfan milljarð Bandaríkjadala.
Áður en Rey kom til sögunnar var það hægara sagt en gert að finna leikföng byggð á kvenpersónum úr spennu- og ofurhetjumyndum. Svarta Ekkjan úr Marvel myndunum, sem leikinn er af Scarlett Johannson var hvergi fáanleg. Núna eru hillur leikfangaverslana undirlagðar af kvenpersónum, Supergirl, Batgirl, Wonder Woman og Jyn Erso úr nýjustu Star Wars myndinni Rogue One svo eitthvað sé nefnt. Það er því ljóst að eftirspurnin er til staðar og það er fagnaðarefni að börn geti leikið sér með fjölbreytt leikföng.
