Leikarinn góðkunni Ashton Kutcher mætti í gær fyrir bandaríska þingnefnd til að afla baráttunni gegn mansali stuðnings. Bandarískar vefsíður á borð við Backpage.com hafa verið í sviðsljósinu vegna mála þar sem stundað var mansal í gegnum smáauglýsingar og börn seld í kynlífsþrælkun. Kutcher vill að tæknin verði betur nýtt í þessari baráttu en hann er stjórnarformaður góðgerðarsamtakana Thorn sem hannað hafa verkfæri fyrir löggæsluaðila til að finna og staðsetja fórnarlömb mansals.

Í kjölfar Backpage.com málsins hefur veirð mikil umræða í Bandaríkjunum um mansal, einkum á börnum. Það var ástæða þess að utanríkismálanefnd bandaríska þingsins hélt opna fundi um málið og þar hélt Kutcher erindi.

Tæknina má nýta til að stunda mansal en einnig til að sporna gegn því,

sagði Kutcher.

Thorn, samtök Kutcher, hafa þróað verkfæri sem kallast Spotlight og sagði hann að það hefði verið notað til að bera kennsl á sex þúsund fórnarlömb mansals á hálfu ári. Það var búið til eftir að rannsókn árið 2012 leiddi í ljós að 63% fórnarlamba mansals sögðu að þau hefðu gengið kaupum og sölum á netinu.

Kutcher sem er 39 ára gamall er giftur leikkonunni Milu Kunis og eiga þau tvö börn. Hann segir að föðurhlutverkið hafi gefið honum aukinn drifkraft í þessari baráttu sinni.

Rétturinn til lífshamingju hefur verið tekinn af svo mörgum sem hefur verið nauðgað, beitt ofbeldi, þau tekin með valdi, lygum eða þvingunum – Hann gengur kaupum og sölum fyrir stundargaman annarra.

Talið er að allt að því 300 þúsund börn eigi á hættu að vera seld í kynlífsþrælkun í Bandaríkjunum árlega samkvæmt dómsmálaráðuneytinu þar í landi. Flest fórnarlömb mansals eru auglýst og seld í gegnum netið samkvæmt skýrslu þingnefndar sem birt var í síðastliðnum mánuði.

Fjölmargar málssóknir hafa verið höfðaðar á hendur Backpage.com þar sem fyrirtækinu er gefið að sök að hafa ýtt undir sölu á börnum til kynlífsþrælkunar með því að birta og endurskrifa auglýsingar þar sem börn voru til sölu.

Kutcher sló þó líka á létta strengi og gaf öldungardeildaþingmanninum John McCain fingurkoss.

.@SenJohnMcCain: „Ashton, you were better looking in the movies.“ pic.twitter.com/Mn1iZM1kMa

— CSPAN (@cspan) February 15, 2017